धरान : कोशी प्रदेश नामाङ्कनलाई खारेज गरी पुनः नामकरण गर्न माग गर्दै आव्हान गरिएको आजको प्रदेश बन्द धरानमा प्रभावशाली देखिएको छ । धरानको मुख्य चौरस्ता भानुचौक बसपार्कमा बिहानै देखी बन्द कर्ताहरू तैनाथ छन् ।
काठमान्डुबाट आएका पहिचानवादी नेता आङकाजी शेर्पाले धरानमा आम हडतालको कमाण्ड सम्हालेका छन् । पुनः नामाङ्कन संयुक्त सङ्घर्ष समितिका प्रमुख घटक किरात याक्थुङ चुम्लुङ, किरात राई यायोख्याका कार्यकर्ताहरू नाका नाकामा सवारी रोक्न खटिएका छन् ।
पहिचानवादी राजनीतिक पार्टी सङ्घीय लोकतान्त्रिक राष्ट्रिय मञ्चका नेता अमर इजम, जसपाका लिम्बुवान अध्यक्ष खगेन्द्र माखिम, राष्ट्रिय जनमुक्ति पार्टीका केन्द्रीय उपमहासचिव विष्णु थाम्देन, चुम्लुङ अध्यक्ष मोहन हुक्पाचोङबाङ लगायत नेताहरू आफै भानुचौकमा खटिएको देखिए ।
भानुचौक स्थित बसपार्क आज खाली छ । लामो र छोटो दुरीका यातायात ठप्प छ । धरानबाट पूर्वी पहाडी क्षेत्रमा चल्ने साना ठुला सार्वजनिक यातायात पनि बन्द छन् । बन्दकर्ताले बजारका मुख्य सडकमा मोटरबाइक, स्कुटर पनि चल्न दिएका छैनन् ।
भानुचौकमा युट्युबरहरु, फेसबुक, टिकटक चलाउनेहरूको नेताहरूको अन्तर्वार्ता लिन, फोटो खिच्नेहरूको रमाइलो स्थल भएको छ ।
सुरक्षाका लागि खटिएका प्रहरीहरू रमिते भएर बसेका छन् । कुनै वाद विवाद, अप्रिय घटना भएको छैन । यो समाचार तयार गर्दा सम्म आम हडताल शान्तिपूर्ण छ ।
