धरान : धरान उपमहानगरपालिका मेयर हर्क साम्पाङलाई दिइएको २४ घण्टे अल्टिमेट अवधिमा संवादको कुनै सङ्केत नआएपछि वडा अध्यक्ष, कार्यपालिका सदस्यहरूले आन्दोलनका प्रारम्भिक कार्यक्रम निर्धारण गरेका छन् ।
उनीहरूले मेयर साम्पाङको कार्य र व्यवहार कार्यपालिकाप्रति गैर जिम्मेवार भएको पद र अधिकारको दुरुपयोग गरेकोमा कार्यशैली सच्याउनु पर्ने, माफी माग्नु पर्ने ५ बुँदे माग सहित आइतबार दिएको अल्टिमेटमा सकिएपछि चरणबद्ध आन्दोलन गर्ने भएका हुन् ।
वडाध्यक्षहरू एवं कार्यपालिका सदस्यहरूको मङ्गलवार बिहान बसेको बैठकले आन्दोलनका प्रारम्भिक ३ वटा कार्यक्रम सुरु गर्ने निर्णय गरेको छ । बैठकमा सहभागी वडा १६ का अध्यक्ष मुरारी भट्टराईका अनुसार ३ दिन सम्म साङ्केतिक रूपमा अघि बढ्ने निर्णय गरिएको छ ।
मेयर साम्पाङबाट संवादको कुनै प्रस्ताव नआएको सङ्केत स्वरूप ३ दिन सम्म सबै वडा अध्यक्ष, कार्यपालिका सदस्यहरूले हातमा कालो पट्टी लगाएर जनताको सेवा, विकास, निर्माणको अनुगमनको कममा खटिने छन् ।
भोलि बुधवार राजनैतिक दलहरूसँग उपमहानगरपालिकामा भइरहेका वडाध्यक्ष, कार्यपालिका सद्स्यहरुको मानमर्दन, अशोभनीय व्यवहार, नियम, कानुन विपरीतका कार्यका विषयहरूलाई धरानवासी जनता बिच लैजाने बारेमा वडाध्यक्षहरू, कार्यपालिका सदस्यहरूको छलफल कार्यक्रम गरिने छ ।
यसबिच वडा अध्यक्षहरू र कार्यपालिका सदस्यहरू मेयर साम्पाङ उपस्थित भएको सार्वजनिक कार्यक्रमहरूमा सहभागी हुने छैनन् । मेयर साम्पाङ समक्ष राखिएका ५ सूत्रीय मागका बारेमा कुनै संवादको प्रस्ताव नआए सम्म बहिष्कार जारी रहने छ । वडाहरूबाट जनतालाई प्रदान गरिने सेवाहरू सुचारु रहने जनाइएको छ ।
