धरान : विजयपुर एफएम रेडियोको सञ्चालक विजयपुर मिडिया ग्रुपले गीत सङ्गीतका नयाँ प्रतिभाहरूका लागि यसपालि गीत लेखन र गायन प्रतियोगिता 'भ्वाइस अफ धरान २०८१ ओपन सिंगिङ कम्पिटिसन' आयोजना गर्दैछ ।
प्रतियोगिताको अडिसन भदौ ५ गते बुधवार देखी हुने आज बिहीबार आयोजित पत्रकार सम्मेलनमा जानकारी दिएको छ । प्रतियोगिता विजयपुर एमएम रेडियोको १६ औँ वार्षिकोत्सवको अवसरमा आयोजना गरिएको कार्यकारी निर्देशक हिमाल राईले बताइन् ।
नेपाली गायनको दुनियाँमा विल्कुलै नयाँ स्वर र नयाँ गीत अघि ल्याउने उद्देश्यमा यसपालिको प्रतियोगिता लक्षित रहेको बताइएको छ । प्रतियोगीहरूले आफूले गाउने गीत आफै रचना गरेर गाउने छन् ।
कार्यक्रम निर्देशक प्रमोद पोर्तेलले भने ‘त्यसका लागि अडिसनमा छानिएका प्रतियोगीहरूलाई ‘वर्कसप’ सञ्चालन गरी गीत लेखन र गायनका आधारभूत ज्ञान प्रदान गरिने छ ।’ यसपालि प्रतियोगिताबाट श्रोताहरूलाई सर्वथा नयाँ गीत र स्वर प्रस्तुत गरिने उनले बताए ।
भदौ ५ गते हुने अडिसनका लागि विजयपुर मिडिया ग्रुप प्रालि. कार्यालय सहित विभिन्न स्थानमा फर्म खुल्ला गरिएको छ। आवेदकहरू मध्ये निर्णायकहरुले अडिसनका लागि २५ जना प्रतियोगीहरूको छनौट गर्नेछन् । छनौट भएको प्रतियोगीहरूले सिधै फाइनल राउण्डमा प्रतिस्पर्धा गर्ने छन् ।
प्रतियोगिताको प्रत्यक्ष प्रसारण स्टुडियोबाट विजयपुर एफएम र विजयपुर मिडियाको युट्युब च्यालनमा गरिने छ । प्रतियोगिता प्रथम स्थान हासिल गर्ने गायकलाई २५ हजार रुपैयाँ नगद सहित गीति एल्बमको प्याकेज पुरस्कार प्रदान गरिने छ ।
यसैगरी दोस्रो, तेस्रो र चौथो स्थान हासिल गर्ने प्रतिभाहरूलाई १५ हजार, १० हजार र ५ हजार पुरस्कार प्रदान गरिने बताइएको छ । प्रतियोगीताका निर्णायकहरूमा अग्रज सङ्गीतकार, गायकहरू रहेका छन् ।