धरान : गृहमन्त्री रमेश लेखक र मुक्कुमलुङ आन्दोलनकारी बिच हिजो सोमवार अबेर रात सम्म वार्ता भएको छ । गृह मन्त्रालयका प्रवक्ता रामचन्द्र तिवारीले गृहमन्त्री र आन्दोलनकारी पक्ष बिच वार्ता भएको पुष्टि गरेका छन् ।
वार्तामा गृहमन्त्री लेखकले मुक्कुमलुङ पाथीभरा केबलकारको विवादको निकास वार्ता र सहमतिबाट खोज्नु पर्नेमा जोड दिएका छन् । आन्दोलनरत पक्षले उच्चस्तरीय वार्ता टोली गठन गर्न माग गरेका छन् ।
गृह मन्त्रालयमा विवाद समाधानका लागि गठित आन्दोलन पक्षका वार्ता टोली सहित सरोकारवालाको सहभागितामा हिजो राती भएको छलफलमा गृहमन्त्री लेखकले आपसी सहमतिबाटै समस्या समाधान गर्न सकिने भएकाले सबै पक्ष गम्भीर हुन आग्रह गरे ।
उनले समस्याको शान्तिपूर्ण निकास खोज्न आग्रह गर्दै विषयप्रति सरकार पनि गम्भीर रहेको बताए ।
यसअघि मन्त्रालयद्वारा गठित वार्ता टोली र आन्दोलनकारी वार्ता टोली बिच भएको वार्ता  असफल भएको थियो । नो केबलकार पक्षले आन्दोलनमा जाने घोषणा गरेको थियो । लगत्तै हिजो बेलुका गृहमन्त्रीसँग छलफल भएको हो ।
छलफलमा ताप्लेजुङका सांसद एमाले नेता योगेश भट्टराईसहित आदिवासी जनजातिका नेताहरूको सहभागिता रहेको थियो । छलफलमा आन्दोलनकारी पक्षका आङकाजी शेर्पा, रमेश राई सहित १० जना सरोकारवाला थिए । उनीहरूले उच्चस्तरीय वार्ता टोली गठन गर्न माग गरेका छन् ।