_1735354691.gif)
धरान : धरान स्थित ३ क्याम्पस महेन्द्र बहुमुखी क्याम्पस, केन्द्रीय प्रविधि क्याम्पस र पूर्वाञ्चल इन्जिनियरिङ क्याम्पसमा स्वतन्त्र विद्यार्थी युनियनको चुनावी मतदान मङ्गलवार बिहान ८ सुरु हुँदैछ ।
तीनवटै क्याम्पसका निर्वाचन समितिले चुनावका सबै तयारी पुरा भएको जनाएको छ ।
महेन्द्र क्याम्पसका निर्वाचन अधिकृत लक्ष्मीकृष्ण श्रेष्ठका अनुसार क्याम्पसमा कुल मतदाता सङ्ख्या ४ हजार २ जना छन् । उनले भने ‘निर्वाचनका सम्पूर्ण तयारी पुरा भएको छ ।’ निर्वाचन स्थलमा ६ वटा मतदान केन्द्र कायम गरिएको छ ।
बिहान ८ बजे सुरु हुने मतदान ५ बजे सम्म चल्ने छ । महेन्द्र क्याम्पसमा १० वटा विद्यार्थी सङ्गठन दर्ता भए पनि नेविसंघ र अनेरास्ववियुको गठबन्धनबाट सभापतिमा नेबिसंघका प्रशान्त राई, अनेरास्ववियु क्रान्तिकारीको तेजबहादुर दुमी, समाजवादी विद्यार्थीका युवराज राई अलौकिक, अनेरास्ववियु क्रान्तिकारी मोहन वैद्य किरणबाट अमृता राई उम्मेदवार रहेको निर्वाचन अधिकृत श्रेष्ठले बताए ।
केन्द्रीय प्रविधि क्याम्पस हात्तीसारका निर्वाचन अधिकृत राम शोभित यादवले क्याम्पसमा कुल मतदाता सङ्ख्या ९६२ रहेको बताए । मतदान बिहान ८ बजे देखी ४ बजे सम्म चल्ने छ ।
उनका अनुसार क्याम्पसमा नेविसंघ र अनेरास्ववियुको गठबन्धनबाट अनिरुद्ध श्रेष्ठ (कृश) सभापति पदको उम्मेदवार रहेका छन् । यस्तै अनेरास्ववियु क्रान्तिकारी र स्वतन्त्र समूह गठबन्धनका स्वतन्त्र समूहको पेशल राज कार्की सभापतिको उम्मेदवार रहेका छन् ।
पूर्वाञ्चल इन्जिनियरिङ क्याम्पसका निर्वाचन अधिकृत विनयलाल श्रेष्ठका अनुसार कुल मतदाता सङ्ख्या २ हजार ३६२ रहेको छ । क्याम्पसमा ७ वटा विद्यार्थी सङ्गठन चुनावको लागि दर्ता भएता पनि ५ वटा प्यानलको उम्मेदवारी परेको छ ।
नेविसंघबाट सागर बस्याल, अनेरास्ववियु क्रान्तिकारीका करण मगर, अनेरास्ववियुको ईश्वर बन्जाडे, समाजवादी विद्यार्थीबाट गणपति झा, स्वतन्त्र विद्यार्थी समूहको सविन धिताल सभापतिका उम्मेदवार छन् । मतदान बिहान ८ बजे देखी ४ बजे सम्म चल्ने छ ।
_1664681437.jpg)
