धरान : नेपाल संस्कृत विश्वविद्यालयको आङ्गिक क्याम्पस पिण्डेश्वर विद्यापीठ स्ववियुमा गठबन्धनका सभापति अनेरास्ववियुका सुधाकर पोख्रेल निर्विरोध निर्वाचित भएका छन् । 

पिण्डेश्वरको चुनावी कार्यक्रम अनुसार चैत १० गते हुने चुनावका लागि आज सोमवार उम्मेदवारी मनोनयन पत्र दर्ता भएको थियो ।

उम्मेदवारी दर्तामा सभापति सहित स्ववियु कार्यसमितिका सबै पदमा १/१ जनाको मात्र उम्मेदवारी परेपछि कार्यसमिति नै निर्विरोध भएको निर्वाचन समिति संयोजक कृष्ण गोपाल अधिकारीले जानकारी दिए ।

सभापति पदमा पोखरेल सहित निर्विरोध निर्वाचित कार्यसमितिमा प्रत्यक्ष तर्फ ७ र समानुपातिक तर्फ ४ गरी ११ जना रहेका छन् । सचिवमा नेविसंघका प्रवेश पौडेल, कोषाध्यक्षमा अनेरास्ववियुका विवेक गुरागाईँ छन् ।

प्रत्यक्ष तर्फका सदस्यहरूमा नेविसंघका छविन्द्र भट्टराई, विजय निरौला, राष्ट्रिय प्रजातान्त्रिक विद्यार्थी सङ्गठन नेपालका दिगन्त प्रसाद घिमिरे, आशिष नेपाल छन् ।

समानुपातिक तर्फ अनेरास्ववियुका अर्जुन निरौला, नेविसंघका गोविन्द अधिकारी, अरुण नेपाल, राष्ट्रिय प्रजातान्त्रिक विद्यार्थी सङ्गठन नेपालका गोपाल गुरागाईँ छन् ।

Pindeshwar-student-2