धरान : किरात राई जातिको सांस्कृतिक पर्व साकेला सिलिका बारेमा हिविस्कस इङ्लिस वोडिङ स्कुल धरान–१५ ले विद्यार्थीहरूलाई जानकारी गराएको छ ।
स्कुलमा सञ्चालित पुस्तक रहित कक्षाको पहिलो कार्यक्रमको पहिलो दिन शुक्रवार साकेला बारे जानकारी गराएको हो । विद्यार्थीहरूलाई सांस्कृतिक अभियन्ता जनकऋषि राईले साकेला नाचको इतिहास, धार्मिक महत्त्व, प्रकृतिसँगको सम्बन्धका बारेमा जानकारी दिए ।
स्कुलका निर्देशक गङ्गाराम राईले विद्यार्थीलाई लिम्बु समुदायको चासोक, मगरको हुर्रा, गुरुङको चाड, तामाङ लगायत सबै जातिका चाडहरूमा सम्बन्धित जाति र समुदायका विज्ञ ल्याएर सो विषयमा पनि जानकारी प्रदान गरिने बताएका छन् ।
बाल क्लब अध्यक्ष निनाम्मा राईको अध्यक्षतामा भएको कार्यक्रममा श्याम चोक सेवा समाजका अध्यक्ष दिनेश राना मगर प्रमुख अतिथि रहेका थिए । श्याम चोक युवा समाजका अध्यक्ष ललित योञ्जन लगायतको उपस्थिति रहेको थियो ।
