धरान : जसपा नेपाल लिम्बुवान राष्ट्रिय समितिको अध्यक्षमा मचिन्द्र बेघा सर्वसम्मत चयन भएका छन् । धरान भएको राष्ट्रिय अधिवेशनबाट बेघाको अध्यक्षतामा १७ सदस्यीय कार्यसमिति गठन भएको हो ।
आइतबार सम्पन्न राष्ट्रिय सम्मेलनद्वारा गठित समिति सोमवार पत्रकार सम्मेलन मार्फत सार्वजनिक गरिएको छ । सम्मेलनले नो कोशी र नो केबलकार आन्दोलनमा निरन्तरता सहभागी हुने सहित ८ बुद्धे प्रस्ताव पारित गरेको छ ।
नवनिर्वाचित राष्ट्रिय समितिको उपाध्यक्ष त्रय मणी लुङगेली, रिता खापुङ, हेमराज जिमी, मुख्य सचिव सञ्जय मेवाहाङ राई, सचिव त्रय सूर्य तमु, सोनीका आठपहरिया, कमल नेम्वाङ, कोषाध्यक्ष गीता कुमारी याक्खा सर्वसम्मत चयन भएका छन् ।
कार्यकारिणी सदस्यहरू टी आर आङदेम्बे, विश्वेश्वर बेघा, मोहन धिमाल, कृष्ण जिमी, देवेन्द्र नेम्बाङ रहेका छन् । सदस्यहरू सरस्वती धिमाल, शान्ता राई, नरेन्द्र लिम्बु चयन भएका छन् ।
समितिको प्रान्तीय सम्मेलन जसपा नेपालका अध्यक्ष पूर्व उपप्रधानमन्त्री उपेन्द्र यादवले उद्घाटन गरेका थिए । ४ सय प्रतिनिधि पर्यवेक्षक सहभागी सम्मेलनले ८ बुद्धे प्रस्ताव पारित गरेको पत्रकार सम्मेलनमा अध्यक्ष बेघाले बताए ।
सम्मेलनले नेपालको ७ प्रदेशको संरचनाले लिम्बुवान, किराँत, शेर्पालुङ, ताम्सालिङ, मगरात, नेवा, तमुवान र खसान लगायतका प्रदेशहरू नसमेटेकोले लिम्बुवान, किराँत शेर्पालुङ लगायतका प्रदेश स्थापनाको सङ्घर्ष जारी राख्ने प्रतिबद्धता जनाएको छ ।
याक्खा, धिमाल स्वायत्त क्षेत्र लगायत विशेष संरक्षित क्षेत्रहरू स्थापना गर्ने, मुक्कुलुङमा केबलकार बनाउने निर्णय खारेज नभएसम्म आन्दोलन गर्ने, पहिचानमा आधारित प्रदेश पुनः नामकरणको जनदबाब सिर्जना गर्दे ‘नो कोशी ’खारेजी आन्दोलनमा निरन्तर लागी पर्ने प्रतिबद्धता जनाएको छ ।
नो कोशी र नो केबलकार आन्दोलनमा पक्राउ परी जेलमा थुनिएका आशिष् साम्बा लगायतलाई तुरुन्त रिहा गर्न सङ्घर्ष गर्ने, आन्दोलनकारीहरूलाई लगाइएको झुटा मुद्दा तुरुन्त विना स्वार्थ खारेज गर्न माग गर्ने प्रतिबद्धता जनाइएको छ ।
भुटानी शरणार्थी, सुन काण्ड, आमेनी काण्ड, बालुवाटार जग्गा काण्ड लगायत भिजिट भिसा भ्रष्टाचारको मुद्रामा संलग्नहरू माथि छानबिन समिती गठन गर्न माग गरिएको छ ।
