धरान : नेपालमा भएको सशस्त्र द्वन्द्व ३१ औँ वर्ष पुगेको सम्झनामा आज शुक्रवार आयोजित रक्तदान कार्यक्रमबाट कुल १०१ प्रिन्ट रगत सङ्कलन भएको छ ।
रक्तदान नेपाली कम्युनिस्ट पार्टी धरान नगर समितिले ३१ औँ जनयुद्ध दिवस मनाउँदै आयोजना गरेको हो । १० वर्षसम्म चलेको सशस्त्र द्वन्द्वमा सहिद र बेपत्ता भएका परिवारप्रति सम्मान प्रकट गर्दै रक्तदान गरिएको नगर संयोजक उद्वव बहादुर लिम्बुले बताए ।
कार्यक्रममा सुनसरी क्षेत्र१ का नेकपाका उम्मेदवार मनोज भट्टराई प्रमुख अतिथि थिए । उनले जनयुद्धकै कारण देशमा ऐतिहासिक परिवर्तन सम्भव भएको बताए ।
राजनीतिक परिवर्तन केवल सत्ता परिवर्तन मात्र नभई सामाजिक न्याय, समानता र अवसरको समान पहुँच सुनिश्चित गर्ने प्रक्रियाको सुरुवात भएको उनको भनाई थियो ।
धरान उपमहानगरपालिकाका कार्यवाहक प्रमुख अईन्द्र विक्रम बेघाले जनयुद्धले नेपाली समाजमा आत्मसम्मान,अधिकार र समानताको बीउ रोपेको बताए ।
उनले उनले संसदमा महिलाको उपस्थितिको सुनिश्चितता, निजामती सेवाको अधिकृत तहसम्म दलित र जनजाति समुदायको कोटा व्यवस्था जनयुद्धको उपलब्धि भएको बताए ।
पार्टीका केन्द्रीय सदस्यहरू किरण राई,जीवन राई, उमिता बराइली, मुक्साहाङ मेन्याङबो मुकेश लगायत रक्तदानमा सहभागी थिए ।