इटहरी : नेपाली काँग्रेसका वरिष्ठ नेता डाक्टर शेखर कोइरालाले सुन्दरहरैँचामा शिव प्रसाद ढकालको विजयी अपरिहार्य रहेको बताएका छन्। नेपाली काँग्रेसले टिकट दिएपछि ढकाललाई विजयी गराउन कार्यकर्ताहरू एकजुट हुनुपर्ने बताए । 
पार्टीले गरेको निर्णयमा मान्नुपर्ने भन्दै उनले काँग्रेसका उम्मेदवारलाई विजयी गराएर एकताको सन्देश दिनुपर्ने धारणा राखे। मंगलबार सुन्दरहरैँचा-३ को घरदैलो कार्यक्रममा पुगेका उनले ढकालको पक्षमा मत मागेका हुन् । 
"काँग्रेस एक छ। हामी शिव ढकाललाई यो नगरमा जिताउँछौँ। काँग्रेस बिथोलिएको वा भड्किएको छ भनेर कसैले नसम्झे हुन्छ । हामी एक छौ" कोइरालाले भने। काँग्रेसको एकताले एमाले अत्तालिएको बताउँदै उनले यो एकतालाई अझै अघि बढाउनुपर्ने उनको धारणा छ । 
ढकालको उम्मेदवारी सँगै काँग्रेस बिच तिक्तता आएको गुनासो बढेपछि कोइराला आफै चुनावी अभियानमा जोडिएका हुन् । सभापति शेरबहादुर देउवा निकट मानिएका ढकाललाई कोइराला समूहले असहयोग गरेको भन्ने हाल्ला बढेपछि पार्टी भित्र एकता रहेको सन्देश दिएका छन् । 
महाधिवेशन भएको चिसोपनलाई त्यागेर काँग्रेस कार्यकर्ता विजयी गराउने अभियानमा लाग्न उनले आग्रह गरे । आफू काँग्रेसका उम्मेदवार प्रति धेरै चिन्तित भएको बताउँदै चुनाव जित्ने गरी जनतालाई विश्वासमा लिनुपर्ने बताए ।