सुनसरी : सुनसरीको कोसी टप्पु वन्यजन्तु आरक्षमा नयाँ प्रजातिको चरा देखा परेको छ । नेपालका लागि सन् २०१० मा शुक्लाफाँटा राष्ट्रिय निकुञ्जमा रेकर्ड भएको फुस्रे कण्ठे बगेडी चरा कोसी टप्पुमा पनि देखा परेको हो ।
यसलाई अङ्ग्रेजीमा ग्रे नेट बण्टिङ भनिन्छ । अति दुर्लभ चराको सुचीमा परेको उक्त चरा यस अघि २०१४ मा चितवन २०१९ मा काठमाडौँको मनोहरामा देखिएको थियो । फाट्टफुट्ट देखिने उक्त जातको चरा भँगेरा आकारको हुने गर्दछ । विशेष गरी तराईमा हिउँदको समयमा बस्ने गरेको चरा गाइड अनीश तिम्सिनाले जानकारी दिए । उनले नयाँ जातको चराको आगमनले कोसी टप्पुको गरिमा बढेको बताए । दिनानुदिन चराको सङ्ख्या घटिरहेको थियो । सङ्ख्या घटे पनि प्रजाति थपिएकोमा खुसी छु । तिम्सिनाले भने “चराका लागि उपयुक्त क्षेत्र भएकाले नयाँ चरा थपिनु सुखद हो ।”
फुस्रे कण्ठे बगेडी चरा चिन, भारत, मङ्गोलिया, पाकिस्तान लगायतका केही सीमित देशमा थोरै सङ्ख्यामा पाइने गरेको छ ।
नेपालमा पाइने जम्मा ८८६ प्रजातिमध्ये कोसी टप्पुमा यस अघि ५३३ जातको चरा पाइने गरेको थियो । नयाँ चरा थपिएसँगै आरक्षमा चराको प्रजाति ५३४ भएको छ ।
