धरान : प्रदेश १ सरकारलाई मातृभाषा तथा संस्कृति सम्बन्धी नीति बनाउन सहयोग पुर्याउने उद्देश्यले धरानमा प्रादेशिक भाषा तथा संस्कृति संगोष्ठी उद्योग वाणिज्य सङ्घको सभा हलमा सुरु भएको छ ।
गोष्ठीको उद्घाटन प्रदेश १ का खानेपानी मन्त्री तिलकुमार मेन्याङबोले गरेका छन् । उनले नेपाल बहुजाति, बहुभाषिक, बहुसास्कृतिक मुलुक भएको बताउँदै उनले भने "हाम्रा पुर्खाले बचाएर ल्याएको भाषा, संस्कृति नयाँ पुस्तालाई हस्तान्तरण गर्ने दायित्व प्राज्ञिक वर्गको काँधमा आएको छ ।"
पछिल्लो समय भाषा र संस्कृति माथि आधुनिकताको नाममा भएको अतिक्रमणले नेपाली भाषाहरूको मैलिकता लोप हुने अवस्थामा पुगेको बताए । कार्यक्रमको प्रारम्भमा भाषा, संस्कृति, इतिहासका विद्वान युद्धप्रसाद वैद्यलाई सम्मानित गरिएको छ।
संगोष्ठी नेपाल संस्कृत विश्वविद्यालय एवं टङ्कप्रसाद न्योैपाने अध्ययन अनुसन्धान केन्द्रको आयोजनामा भएको हो । आज दिनभरि चल्ने गोष्ठीमा ८ वटा कार्यपत्र माथि छलफल हुने आयोजक समिति अध्यक्ष डा.रमेश घिमिरेले बताएका छन् ।
