धरान : प्रहरीले मङ्गलवार दिउँसो मोरङको रतुवामाईमा लागुऔषध एक भारतीय कारोबारीलाई पक्राउ गर्न जाँदा प्रहरी माथि नै आक्रमण गरेपछि गोली प्रहार गरेर पक्राउ गरेको छ । घट्नामा एक प्रहरी घाइते भएका छन् ।
रतुवामाई नगरपालिका-६ कादुपाडामा लागुऔषध ओसारपसारमा संलग्न एकजना भारतीय नागरिक ३४ वर्षीय भगिरथ हरिजनलाई गोली प्रहार गरी प्रहरीले नियन्त्रणमा लिएको कोसी प्रदेश प्रहरी कार्यालय विराटनगरले जनाएको छ ।
लागुऔषध खैरो हेरोइनको ओसारपसार भइरहेको सूचनाको आधारमा इलाका प्रहरी कार्यालय सिजुवा मोरङ, लागुऔषध नियन्त्रण ब्युरो कोटेश्वर काठमाडौँ र लागुऔषध नियन्त्रण ब्युरो काँकडभिट्टाबाट संयुक्त रूपमा खटिएको प्रहरी टोलीले हरिजनलाई पक्राउ गरेको हो ।
भारतीय नम्बर प्लेट बीआर ३८ क्यु ३८३० नम्बरको मोटरसाइकलमा चढेको हरिजनलाई नियन्त्रणमा लिने क्रममा प्रहरी माथि नै आक्रमण गर्दा १ जना प्रहरी कर्मचारी समेत सामान्य घाइते भएको प्रदेश प्रहरीले जनाएको छ ।
घट्नामा प्रहरीले प्रतिकार स्वरूप २ राउण्ड गोली तिघ्रामा प्रहार गरी हरिजनलाई नियन्त्रणमा लिएको हो । उनको साथबाट प्रहरीले १४९ ग्राम लागुऔषध ब्राउन सुगर बरामद गरेको छ ।
प्रहरीको गोली लागेर घाइते भएका हरिजनको प्रहरीको निगरानीमा मदन भण्डारी अस्पताल मङ्गलबारेमा उपचार भइरहेको छ । घटना सम्बन्धमा प्रहरीले थप अनुसन्धान गरिरहेको छ ।