_1749430366.gif)
इटहरी : इटहरी वडा नं. १ मा अवस्थित राष्ट्रिय माध्यमिक विद्यालयले शनिवार ९५ जना विद्यार्थीलाई छात्रवृत्ति वितरण गरेको छ ।
विद्यालयको ७० औँ वार्षिकोत्सवको अवसरमा बाल विकासदेखि कक्षा १२ सम्म अध्ययन गर्ने विद्यार्थीलाई दाताले स्थापना गरेको २७ लाख बराबरको अक्षयकोष कोषको ब्याजबाट प्राप्त रकम बराबरको छात्रवृत्ति वितरण गरेको हो ।
अहिलेसम्म विद्यालयमा ३७ वटा अक्षयकोष विभिन्न दाताले स्थापना गरेको विद्यालय प्रशासनले जनायो । विद्यालयले वर्ष भरी विभिन्न गतिविधिमा उत्कृष्ट हुने छात्रा छात्रलाई पनि पुरस्कार तथा प्रमाणपत्र प्रदान गरियो ।
दाताहरूले स्थापना गरेको अक्षयकोषबाटै उत्कृष्ट शिक्षण गर्ने शिक्षक शिक्षिकामध्ये खगिनकुमार चौधरी, सागर कटुवाल र युनिसा बस्नेतलाई पनि नगदसहित सम्मान गरियो । उनीहरूलाई विद्यार्थीले अन्तिम परीक्षामा प्राप्त नतिजाका आधारमा छनोट गरेर पुरस्कार तथा सम्मान गरिएको हो ।
साथै, बढी समय विद्यालय उपस्थित हुने शिक्षक शिक्षिकामध्ये सावित्री श्रेष्ठ, इन्दिरा थापा र कुमारी भारतलाई पनि दाताकै कोषबाट नगदसहित सम्मान गरियो । विद्यालयको तर्फबाट फरक फरक विधामा उत्कृष्ट कार्य गर्ने शिक्षक शिक्षिकामध्ये रोशना नेपाल, वन्दना दाहाल, अन्तिम राई, लोकबहादुर भण्डारी, भूपराज पुरी र लक्ष्मण घिमिरेलाई नगदसहित सम्मान गरियो ।
वार्षिकोत्सवको अवसरमा विद्यालयमा अक्षयकोष स्थापना गर्नेसँगै अन्य भौतिक पूर्वाधारतर्फ सहयोग गर्ने नौ जना व्यक्तित्वलाई मरणोपरान्त सम्मान गरियो । सो सम्मान परिवारका सदस्यले ग्रहण गरे । विद्यालयमा बर्सेनि अक्षयकोष स्थापना गर्ने क्रम बढिरहँदा यस वर्ष मात्र छटा नयाँ अक्षयकोष स्थापना भएको विद्यालयका प्रधानाध्यापक सरनकुमार बस्नेतले बताए । विद्यालयले यस वर्षदेखि टिचर अफ दि इयर र स्टुडेन्ट अफ दि इएर घोषणा गरेकोमा शिक्षकतर्फ युवराज काफ्ले र विद्यार्थीतर्फ कक्षा ९ का कृष्ण खनाल घोषित भए । दुवैलाई नगदसहित सम्मान गरियो ।
वार्षिकोत्सवको अवसरमा आर्थिक वर्ष २०८१÷०८२ को वार्षिक आय–व्यय विद्यालयका प्रधानाध्यापक सरनकुमार बस्नेतले गरे । जसमा आन्तरिक र बाह्य गरी वार्षिक आम्दानी चार करोड ८८ लाख ९६ हजार १४६ रुपैयाँ र व्ययतर्फ चार करोड ८७ लाख ५० हजार ७२ रुपैयाँ प्रस्तुत गरिएको थियो ।
सोही क्रममा भूतपूर्व विद्यार्थीद्वारा २० लाख रुपैयाँ खर्चेर निर्माण गर्न लागिएको सभा हलको शिलान्यास समेत गरियो । सभा हलको शिलान्यास कार्यक्रमका प्रमुख अतिथि कोशी प्रदेशका उद्योग, पर्यटन, वन तथा वातावरण मन्त्री षडानन्द मण्डलले गरे । कार्यक्रममा मण्डलले सामुदायिक विद्यालयमा सरकारले लगानी गरिरहँदा राष्ट्रिय माध्यमिक विद्यालयले गरेको उत्कृष्ट कार्यको प्रशंसा गरे । उनले प्रदेश सरकारले यस्ता विद्यालयलाई आवश्यक सहयोग गर्ने वचन पनि दिए ।
वार्षिकोत्सवको अवसरमा साताव्यापी खेलकुद प्रतियोगिता भएको थियो । खेलकुदका ५१ वटा विभिन्न विधामा उत्कृष्ट ३०० जनालाई हरेक दिन कार्यक्रम सम्पन्न भए लगतै पुरस्कार प्रदान गरिएको थियो । विद्यालयको वार्षिकोत्सव विद्यालय व्यवस्थापन समितिका अध्यक्ष कोविदजंग कार्कीको अध्यक्षतामा भएको थियो ।
