_1749430366.gif)
वराहक्षेत्र : वराहक्षेत्र नगरपालिका-२ स्थित हरिद्वार कृषि सहकारी संस्थाले आफ्नो १२औँ स्थापना दिवस तथा ११औँ वार्षिक साधारण सभा आइतबार सम्पन्न गरेको छ।
बेसारको धुलो र विभिन्न स्वादका मसला सामग्री उत्पादन, प्रसोधन र बिक्री-वितरणमार्फत स्थानीय उत्पादन प्रवर्द्धन, स्वरोजगार तथा कृषि विकासमा सक्रिय सहकारीले वार्षिक कार्यक्रम चतरा स्थित औलिया मठको सभाहलमा आयोजना गरेको हो।
कार्यक्रममा वराहक्षेत्र नगरपालिकाका प्रमुख रमेश कार्की प्रमुख अतिथिका रूपमा सहभागी भएका थिए। सो अवसरमा प्रमुख प्रशासकीय अधिकृत गणेश बहादुर कटुवाल, वडा नं २ का अध्यक्ष होमप्रसाद गौतम, वडा नं. १ का अध्यक्ष किसन थापा मगरसहित स्थानीय जनप्रतिनिधि, छिमेकी सहकारी संस्थाका पदाधिकारी तथा सहकारीकर्मीहरूको उपस्थिति थियो।
सभाका अध्यक्ष तथा संस्थाका अध्यक्ष लोकबहादुर दाहालले संस्थाको प्रगति प्रतिवेदन, आर्थिक वर्ष २०८१/८२ को आर्थिक प्रतिवेदन तथा २०८२/८३ का लागि अनुमानित वार्षिक योजना प्रस्तुत गरे। कार्यक्रममा स्वर्गीय सेयर सदस्य रोमराज राईलाई मरणोपरान्त सम्मान गरिएको थियो।
त्यस्तै जेष्ठ तथा एकल महिला बिष्णुमाया लिम्बु, बिष्णुमाया राई र सुकुमाया राईलाई सम्मान गरिएको थियो। पूर्व कर्मचारी विर बहादुर दाहाल र संस्थाका संस्थापक सञ्चालक समिति पदाधिकारीहरूलाई पनि सम्मान प्रदान गरिएको थियो।
कार्यक्रममा स्वागत मन्तव्य सहकारीका उपाध्यक्षले राखे भने सञ्चालन सञ्चालक समिति सदस्य राजन आचार्यले गरेका थिए। हाल सहकारीमा ५६६ जना सेयर सदस्य रहेको संस्थाले जनाएको छ।
