_1749430366.gif)
झापा : झापाको दमक क्षेत्रमा पछिल्लो समय होटेल तथा आतिथ्य व्यवसायमा लगानी बढ्दै गएको देखिएको छ ।
यस क्रममा दमक नगरपालिका-४ स्थित मावा पुल नजिकै एक सुबिधासम्पन्न होटेल सञ्चालनमा आएको छ । झापाली युवा व्यवसायी टिका बस्नेतले करिब साढे तीन करोड रुपैयाँको लगानीमा होटेल कोजी होम सञ्चालनमा ल्याएका हुन ।
नयाँ होटेल सञ्चालनमा आएपछि स्थानीय स्तरमा रोजगारी सिर्जना हुनुका साथै दमक क्षेत्रको होटेल व्यवसाय थप सक्रिय बन्दै गएको छ । व्यवसायी बस्नेतका अनुसार होटेलमा हाल १५ वटा व्यवस्थित कोठा रहेका छन् । यहाँ बसोबासका लागि आवश्यक आधारभूत सुविधासँगै खानपानको पनि राम्रो व्यवस्था गरिएको छ ।
होटेलमा स्वच्छ तथा पारिवारिक वातावरणमा सेवा प्रदान गर्ने लक्ष्यका साथ सञ्चालन सुरु गरिएको बस्नेतले जानकारी दिए । होटेलमा अहिले नै केही स्थानीय युवायुवतीले रोजगारी पाइसकेका छन् भने आगामी दिनमा सेवा विस्तारसँगै थप रोजगारी सिर्जना हुने अपेक्षा गरिएको छ ।
विशेषगरी पूर्व–पश्चिम राजमार्ग नजिक पर्ने भएकाले यात्रु तथा पर्यटकलाई लक्षित गरी होटेल सञ्चालनमा ल्याइएको हो । दमक हुँदै यात्रा गर्ने आन्तरिक पर्यटक तथा व्यापारिक प्रयोजनका लागि आउने पाहुनालाई सहज बसोबास उपलब्ध गराउने उद्देश्यले होटेल स्थापना गरिएको सञ्चालकको भनाइ छ ।
होटेलमा बसोबास र खानपान सुविधासँगै आधुनिक सेवाहरू पनि विस्तार गर्ने तयारी गरिएको छ । विद्युतीय सवारी साधनको प्रयोग बढ्दै गएको अवस्थालाई ध्यानमा राख्दै होटेल परिसरमा ईभेहिकलका लागि चार्जिङ स्टेशन स्थापना गर्ने काम समेत भइरहेको बताइएको छ । यसले यात्रुहरूलाई थप सुविधा प्रदान गर्ने विश्वास गरिएको छ ।
स्थानीय व्यवसायीहरूका अनुसार पछिल्लो समय दमकमा व्यापार, सेवा र आवाससँग सम्बन्धित पूर्वाधार विस्तार हुँदै गइरहेको छ । नयाँनयाँ होटेल, रेष्टुरेन्ट तथा सेवा केन्द्रहरू खुल्न थालेपछि आर्थिक गतिविधि समेत बढ्दै गएको छ ।
यसैबीच, मावा पुल आसपासको क्षेत्रमा
सुबिधासम्पन्न होटेल सञ्चालनमा आएपछि स्थानीय स्तरमा आर्थिक गतिविधि
बढ्नुका साथै रोजगारीका अवसरहरू पनि विस्तार हुने अपेक्षा गरिएको छ ।
स्थानीय बासिन्दाहरूले पनि नयाँ लगानीले क्षेत्रको विकासमा सकारात्मक
प्रभाव पार्ने विश्वास व्यक्त गरेका छन् ।
