धरान : र्याडिकल लाईटले आयोजना गर्दै आएको एसइई स्पिकर प्रतियोगिताको यसपाली हुने ‘छैटौँ संस्करण विद्यार्थीलाई संसदीय अभ्यास गराउने विषयमा केन्द्रित रहने बताइएको छ ।
यसपालिको प्रतियोगिताको तयारी बारे जानकारी दिन सोमबार आयोजित पत्रकार सम्मेलनमा र्याडिकल लाईटका अध्यक्ष तीर्थ कार्कीले उक्त कुरा बताएका हुन । प्रतियोगिता २०७८ साल देखी चल्दै आएको छ ।
प्रतियोगिता यस पटक फरक र रचनात्मक हुने अध्यक्ष कार्कीले बताए । उनका अनुसार यसपालिको प्रतियोगितामा मुख्य आकर्षण ‘नमुना संसद्’ अभ्यास समावेश गरिएको छ ।
नमुना संसदमा विद्यार्थीहरूलाई वास्तविक संसद् जस्तै मन्त्री, सांसद र सभामुखको भूमिकामा प्रस्तुत गरिने छ । यस अभ्यासले विद्यार्थीहरूलाई भाषण कला मात्र नभई कानुन निर्माण प्रक्रिया, संसदीय मर्यादा तथा लोकतान्त्रिक मूल्यमान्यता बारे अनुशिक्षण हुने विश्वास गरिएको छ ।
यसपाली हुने धरान अन्तर विद्यालय प्रतियोगिता व्यवस्थित र गुणस्तरीय बनाइने कार्कीले बताए । उनका अनुसार सिजन–६ मा कुल १०० पूर्णाङ्कमध्ये ७५ अङ्क वक्तृत्वकला भाषणबाट र बाँकी २५ अङ्क ‘नमुना संसद्’ अभ्यासबाट प्रदान गरिने छ ।
प्रतियोगितामा सहभागी विद्यार्थीहरूलाई विभिन्न चरणमा विशेषज्ञहरूद्वारा तालिम प्रदान गरिने छ । अन्तिम चरणमा छनोट भएका उत्कृष्ट विद्यार्थीहरूले ‘नमुना संसद्’को पूर्ण अभ्यासमा सहभागिता जनाउने छन् ।
प्रतियोगिताका विजेताले १५ हजार नगद पुरस्कार प्राप्त गर्नेछन् । फस्ट रनरअपले ७ हजार, सेकेन्ड रनरअपले ३ हजार र थर्ड रनरअपले १ हजार ५ सय नगद पुरस्कार प्राप्त गर्नेछन् । प्रतियोगिताको छनोट चरण वैशाख १८ गते सम्पन्न हुने आयोजकले जनाएको छ ।
