चतरा : वराहक्षेत्र नगरपालिकाले चाडपर्व पछि पनि बजार अनुगमनको कार्यलाई निरन्तरता दिन थालेको छ । दसैँ तिहार लक्षित अनुगमन सम्पन्न गरेको नगरपालिकाले बजार अनुगमनलाई प्रभावकारी बनाउन अनुगमन सुरु गरेको हो ।
नगरपालिकाले शनिवार वराहक्षेत्र नगरपालिकाको १ नम्बर वडाको वराहक्षेत्र धाम परिसरका बजारहरू अनुगमन गरिएको आर्थिक विकास शाखाका अधिकृत मातृका तिवारीले बताए । तिवारीका अनुसार यस अगाडि नगरपालिकाले चाडपर्व लक्षित गरेर चतरा, कालाबञ्जर, चक्रघट्टि, प्रकाशपुर बजार अनुगमन गरेको थियो ।
वराहक्षेत्र नगरपालिकाकी उपप्रमुख नन्दकुमारी सुनुवार नेतृत्वको अनुगमन टोलीले बजारका होटेल, पसलहरूको अनुगमन गरेको थियो । अनुगमनको क्रममा उपभोग्य मिति नाघेका खाद्य वस्तु टोलीले नियन्त्रणमा लिएर नष्ट गरिदिएको छ। म्याद नाघेका बस्तु बिक्री वितरण गर्न राखिएको पसलहरूलाई र मूल्य वृद्धि गरेर बिक्री गर्ने पसलहरूलाई सचेत गराइएको प्रमुख प्रशासकीय अधिकृत ऋद्धि प्रकाश सिटौलाले बताए ।
टोलीले अनुगमनका क्रममा बिल विजक चुस्त दुरुस्त नराखेको, मुल्यसूची नराखेको, राखेको भए पनि त्यसलाई दैनिक रूपमा व्यवस्थापन नगरेको, पसलमा उपभोग्य मिति सकिएका खाद्यवस्तु फेला पारेको थियो । साथै विद्युतीय तराजुको आवश्यक कागजात नराखेको फेला परेपछि तत्काल सबै प्रक्रिया पुर्याएर आवश्यक कागजात राखी दर्ता गर्न व्यवसायीहरूलाई सुझाव दिइएको नगरपालिकाका प्रमुख प्रशासकीय अधिकृत ऋद्धि प्रकाश सिटौलाले बताए ।
अनुगमनमा खुद्रा व्यवसायीहरूलाई होलसेल व्यवसायीले जारी गरेको बिल विजक सुरक्षित राख्न र माग गरेका बेला उपलब्ध गराउन भनेको उपप्रमुख नन्दकुमारी सुनुवारले बताइन । बजारमा मूल्य वृद्धि, म्याद नाघेका सामाग्री र कालोबजारीलाई नियन्त्रण गर्न नगरपालिकाले बजार अनुगमन सुरु गरेको हो।
नगर उपप्रमुख सुनुवार नेतृत्वको अनुगमन टोलीमा प्रमुख प्रशासकीय अधिकृत ऋद्धि प्रकाश सिटौला, वडाध्यक्ष, नगरपालिकाको आर्थिक विकास शाखाका कर्मचारी लगाएको सहभागिता रहेको थिए ।
