धरान : राष्ट्रिय निजी तथा आवासीय विद्यालय एसोसिएसन, एन प्याव्सन बास्केटबल च्याम्पियनको उपाधि धरान मेघा र लोटस स्कुलले चुमेको छ । आज शुक्रवार भएको फाइनल खेलमा पुरुष तर्फ धरान मेघाले लोटस स्कुललाई ४२–३१ र महिला तर्फ सियोनले पर्वत स्कुललाई १८-७ अङ्कको अन्तरले पराजित गर्दै उपाधि चुमेका हुन ।
फाइनल खेलको प्रत्येक क्वाटरमा पुरुष तर्फ धरान मेघा र लोटसले ९-४, १३-२, १४-१३ र ६-१२ अङ्क जोडेको थियो । महिला तर्फ सियोन र पर्वत स्कुलले ३-३, ४-०, ४-२ र ७-२ अङ्क जोडेको थियो । धरान नगर स्तरीय अन्तर विद्यालय महिला पुरुष बास्केटबल प्रतियोगिता एन प्याब्सन धरान नगर कमिटीले आयोजना गरेको हो ।
समापन समारोहमा प्रमुख अतिथि धरान उपमहानगरपालिका शिक्षा शाखा प्रमुख शम्भुप्रसाद पाण्डे, धरान मेघा कलेजका अध्यक्ष कैलाश लिम्बू, बास्केटबल सङ्घका केन्द्रीय उपाध्यक्ष सुरजकुमार लामा, सुनसरी बास्केटबल सङ्घका अध्यक्ष नारायण सुवेदी, सियोन स्कुलका अध्यक्ष खड्कबहादुर मगरले प्रतियोगितामा विजेता तथा उपविजेता टिम एवं खेलाडीहरूलाई ट्रफी, मेडल र प्रमाणपत्र प्रदान गरेका थिए ।
प्रतियोगिताको उत्कृष्ट खेलाडी पुरुष तर्फ धरान मेघाका योगेश राई र महिला तर्फ सियोन स्कुलका सेरिना लिम्बू घोषित भइन । प्रतियोगिताका हाइ स्कोरर पुरुष तर्फ लोटस स्कुलका सावन माझी र महिला तर्फ पर्वत स्कुलका श्वेता राई घोषित भइन । सावनले प्रतियोगिता भरी तीन खेल बाट व्यक्तिगत २५ अङ्क र श्वेताले २७ अङ्क जोडेका थिए ।
एन प्याब्सन खेलकुद सप्ताहको बास्केटबल प्रतियोगितामा कक्षा १२ सम्मका महिला तर्फ ८ र पुरुष तर्फ ८ टिमले सहभागी थिए । धरान-१२ स्थित धरान मेघा कलेजको बास्केटबल कोर्टमा सम्पन्न प्रतियोगितामा धरान बास्केटबल सङ्घको प्राविधिक सहयोग रहेको थियो ।
