सुनसरी : प्रधानमन्त्री कप महिला राष्ट्रिय टी-२० क्रिकेट प्रतियोगिताको उपाधिका लागि आज प्रदेश १ र सुदूरपश्चिम प्रदेश भिड्ने भएका छन् ।
इटहरीको जनता क्रिकेट पार्कमा जारी प्रतियोगिता अन्तर्गत शुक्रवार भएको सेमिफाइनलमा एपीएफलाई ८ विकेटले पराजित गर्दै प्रदेश १ उपाधि नजिक पुगेको हो । प्रदेश १ ले उपाधिका लागि आज हुने फाइनलमा सुदूरपश्चिम सँग प्रतिस्पर्धा गर्नेछ । यसअघि शुक्रवार नै भएको पहिलो सेमिफाइनलमा मधेस प्रदेशलाई पराजित गर्दै सुदूरपश्चिमले पनि फाइनलमा स्थान सुरक्षित गरेको छ ।
दोस्रो सेमिफाइनलमा एपीएफ क्लबमाथि ८ विकेटको सहज जित निकाल्दै प्रदेश-१ ले सुदूरपश्चिम सँगको उपाधि भिडन्त पक्का गरेको हो । एपीएफले दिएको ४६ रनको लक्ष्य प्रदेश-१ ले ९ ओभरमा २ विकेट गुमाएर पूरा गरेको थियो।
शुक्रवार नै भएको पहिलो सेमिफाइनलमा सुदूरपश्चिमले मधेस प्रदेशमाथि १ सय १४ रनको फराकिलो जीत निकाल्दै फाइनलमा स्थान बनाएको छ । टस जितेर पहिला ब्याटिङ थालेको सुदूरले निर्धारित २० ओभरमा २ विकेट गुमाउँदै १ सय ८० रनको योगफल बनाएको थियो ।
