धरान : धरान उपमहानगरपालिका मेयर हर्क साम्पाङले धराने माया साबुन उद्योग खोल्न भवन निर्माणाधीन जग्गा बन क्षेत्रमा परेको भन्दै बन कार्यालयले उच्च अदालत विराटनगरमा दिएको रिट खारेज भएको छ ।
उच्च अदालतको फैसला लगत्तै मेयर साम्पाङको अधिवक्ता स्वागत नेपालले फेसबुकमा 'हर्क साम्पाङको मुद्दामा जनताको जीत’ भन्दै लेखिएको स्ट्याटसमा रिट खारेज भएको जानकारी दिइएको हो । न्यायाधीशद्वय कमलकृष्ण अधिकारी र मुरारी श्रेष्ठको संयुक्त इजलासले रिट खारेज गर्ने फैसला गरेको अधिवक्ता नेपालको स्ट्याटसमा उल्लेख छ।
गत पुस ६ गते सब डिभिजन बन कार्यालय विष्णुपादुका तथा डिभिजन बन कार्यालय सुनसरीले मेयर हर्क साम्पाङ विरुद्ध दायर गरेको रिटको सुनवाइ गर्दै उच्च अदालत विराटनगरले उत्प्रेषणको परमादेश जारी गरेको थियो । उक्त आदेशले मेयर साम्पाङको निर्माणाधीन साबुन उद्योगको काम रोकिएको थियो ।
उक्त आदेशमा मुद्दाको अन्तिम टुङ्गो नलागे सम्म बन क्षेत्र भित्रको जग्गा अतिक्रमित हुने गरी साबुन उद्योग निर्माण गर्ने गराउने कार्य नगर्नु नगराउनु भनिएको थियो । आज भएको फैसलाले मुद्दाको अन्तिम टुङ्गो रिटलाई नै खारेज गर्ने फैसलाको रूपमा आएको हो । फैसलाको पूर्णपाठ भने सार्वजनिक भएको छैन ।
