इटहरी : नेपाली काँग्रेस इटहरी उपमहानगर समितिले विश्वेश्वरप्रसाद कोइरालाको ११० औँ जन्म जयन्ती मनाएको छ । काँग्रेस संस्थापक नेता कोइरालाको ११० औँ जन्मोत्सवमा ११० वटै दीप प्रज्वलन गरेको हो ।
प्रथम जननिर्वाचित प्रधानमन्त्री तथा प्रजातान्त्रिक समाजवादका प्रणेता कोइरालाको सम्झनामा देशैभर विभिन्न कार्यक्रम भइरहेका छन् । सोही क्रममा इटहरी काँग्रेसले बिपीलाई सम्झिएको हो ।
नेपाली राजनीति र साहित्य क्षेत्रमा बिपीको योगदान अतुलनीय रहेको बताउँदै नगर सचिव विक्रम घिमिरेले बिपीलाई अनुसरण गरेर अगाडि बढ्नुपर्ने बताए । काँग्रेस बिपीको समाजवादी विचार र प्रगतिशीलताको बाटोबाट विमुख हुननहुने उनको धारणा छ ।
कार्यवाहक सभापति बालकृष्ण विष्टको सभापतित्वमा सम्पन्न कार्यक्रममा काँग्रेस प्रदेश सदस्य केशव भट्टराई, एमाले केन्द्रीय सदस्य लक्ष्मी गौतम, वडा नम्बर ६ का वडाध्यक्ष दिवस पोखरेल लगायतको उपस्थिति थियो ।
आज देखी काँग्रेस केन्द्रीय समितिले बिपी साहित्य महोत्सव २०८० आयोजना गरेको छ। ३ दिन सम्म केन्द्रीय कार्यालय सानेपामा चल्ने सम्मेलन भदौ २७ गते समापन हुदैछ ।