धरान : डिपो माध्यमिक विद्यालयले आयोजना गरेको पाँचौँ अन्तर विद्यालय मेजर श्रवणकुमार लिम्बू स्मृति बास्केटबल रनिङ कप शुक्रबारदेखि सुरु भएको छ।
उद्घाटन खेलमा हिमालयन मेघा एकेडेमी धरान,हिमशिखर इङ्लिस बोर्डिङ स्कुल इटहरी, डिपो माध्यमिक विद्यालय धरान र दिल्ली पब्लिक स्कुल (डीपीएस) धरान विजयी भएका छन्।
डिपो माध्यमिक विद्यालयको खेल मैदानमा भएको पहिलो खेलमा हिमालयन मेघा एकेडेमीले अरनिको इङ्लिस बोर्डिङ स्कुललाई ६१–३० अङ्कले पराजित गर्यो। हिमालयनले चारै क्वाटरमा क्रमशः १२–८, १७–६, १५–७ र १६–९ अङ्कको अग्रता कायम गर्दै सहज जित दर्ता गर्यो।
अर्को खेलमा हिमशिखर इङ्लिस बोर्डिङ स्कुल इटहरीले सियोन स्कुल धरानलाई ३५–२३ अङ्कले हरायो। हिमशिखरले क्वाटरहरूमा ७–५, १३–५, ७–५ र ८–८ को नतिजा निकाल्दै जित सुनिश्चित गर्यो।
उद्घाटन खेलमा आयोजक डिपो माध्यमिक विद्यालयले आइडल बोर्डिङ स्कुल धरानलाई २८–२० अङ्कले पराजित गर्यो। डिपोले पहिलो, दोस्रो, तेस्रो र चौथो क्वाटरमा क्रमशः १०–४, ४–२, ६–८ र ८–६ अङ्क जोड्दै जित आफ्नो पक्षमा पार्यो।
यस्तै, ब्राइट फ्युचर एकेडेमी मोरङ खेल मैदानमा उपस्थित नभएपछि दिल्ली पब्लिक स्कुल धरान स्वतः विजेता घोषित भएको थियो।
कक्षा १० सम्मका विद्यार्थी लक्षित प्रतियोगितामा मोरङ, सुनसरी र झापाका १६ विद्यालय सहभागी छन्। साउन १५ देखि १९ गतेसम्म सञ्चालन हुने प्रतियोगिताको विजेताले नगद २० हजार रुपैयाँसहित ट्रफी, मेडल र प्रमाणपत्र प्राप्त गर्नेछ भने उपविजेताले १० हजार रुपैयाँसहित ट्रफी,मेडल र प्रमाणपत्र पाउनेछ। उत्कृष्ट खेलाडी, उच्च स्कोर र राइजिङ प्लेयरलाई पनि ट्रफी तथा प्रमाणपत्र प्रदान गरिने आयोजकले जनाएको छ।
प्रतियोगिता विद्यालयका पूर्व अध्यक्ष तथा डिपोट सार्वजनिक शैक्षिक गुठीका संस्थापक अध्यक्ष स्वर्गीय मेजर श्रवणकुमार लिम्बूको स्मृतिमा आयोजना गरिएको हो। विद्यालयको नेतृत्व गरिरहेकै बेला कोरोना महामारीका क्रममा २०७८ साल साउन १५ गते उनको निधन भएको थियो।
