इटहरी : घरेलु टोली राष्ट्रिय जागृति क्लबलाई हराउँदै चर्च व्बाइज युनाइटेड इटहरी गोल्डकपको सेमिफाइनल प्रवेश गरेको छ ।
इटहरी रङ्गशालामा जारी प्रतियोगिताको दोस्रो क्वाटर फाइनल खेलमा चर्च व्बाईजले २-० गोल अन्तरले जितेको हो । पहिलो हाफमा १-० गोल अन्तरको अग्रता बनाएको चर्च व्बाइजले दोस्रो हाफमा १ गोल ग¥यो ।
चर्च व्बाइजको जितमा आशिष चापागाईँ र मौसम लिम्बुले गोल गरे । खेलको सुरुवातबाटै दबाब बनाएको चर्च व्बाइजले ४५ औ मिनेटमा अग्रता बनायो । आशिष चापागाईँलाई डिबक्स भित्र राष्ट्रिय जागृतिका गोलरक्षक निरोज चौधरीले लडाएपछि चर्च ब्वाइजले पेनाल्टी पाएको थियो ।
कप्तान मिलन राईको पेनाल्टी प्रहार रिबाउन्ड भएर आएपछि पाएको अवसरलाई चापागाईँले गोलमा परिणत गरे ।
५६ औ मिनेटमा मौसम लिम्बुले अग्रता दोब्बर बनाए । विवेक पौडेलको स्थानमा मैदान प्रवेश गरेको २ मिनेट नबित्दै लिम्बुले गोल गरेका थिए । खेलको म्यान अफ दि म्याच चर्च ब्वाइजका प्रशान्त लक्सम घोषित भए । उनले नगद १० हजार प्राप्त गरे ।
राष्ट्रिय जागृतिका अफिसियल सजिवन राईले पहिलो गोल व्यहोरेपछि टिम दबाबमा परेको बताए । उनले गोलरक्षकको गल्तीबाट पहिलो गोल व्यहोर्नुनै पराजयको मुख्य कारण भएको बताए । एक महिनाको तयारीबाट टिमले उत्कृष्ट खेल देखाएको उनले बताए ।
चर्च ब्वाइजका प्रशिक्षक प्रदीप हुमागाईँले लिगको निरन्तर खेलका कारण खेलाडीहरू थकित भएकाले पाएको अवसरहरू सदुपयोग हुन नसकेको बताए । उनले खेलमैदानको अनुभव नभएको कारण पनि पाएको अवसरलाई गोलमा परिणत गर्न नसकेको बताए । उनले खेलमा देखिएका कमजोरीलाई आगामी खेलमा सुधार गर्ने बताए । भोलिको खेल मच्छिन्द्र क्लब काठमाडौँ र कञ्चनजंगा फुटबल क्लब भारतबिच खेल हुनेछ ।
