वराहक्षेत्र : वराहक्षेत्र नगरपालिकामा जारी वडा स्तरीय वराहक्षेत्र मेयर लिग कप रनिङ शिल्ड फुटबल प्रतियोगिता अन्तरगत बुधवार भएको पहिलो खेलमा वडा नं. ७ विजयी भएको छ।
वडा नं.५ लाई शून्यका विरुद्ध दुई गोलको अन्तरले पराजित गर्दै वडा नं.७ प्रतियोगितामा नौ अङ्क जोड्दै अन्तिम चारमा प्रवेश गर्न सफल बनेको छ । वडा नं ५ ले लिग चरणका चार खेलमा एक खेलमा बराबरी, दुई खेलमा विजयी र एक खेलमा पराजित हुँदै प्रतियोगितामा सात अङ्क जोड्दै लिग टुङ्ग्याएको छ । खेलमा  वडा नं ७ का रोजन रोक्का म्यान अफ द म्याच  घोषित भए । उनले नगद दुई हजार एक सय सहित ट्रफि प्राप्त गरेका थिए ।
समूह 'ख' बाट वडा नं.२ समूह विजेता बन्दै लिगको सेमिफाइनलमा प्रवेश गरेको छ । वडा नं.२ ले प्रतियोगितामा चार खेलबाट नौ अङ्क प्राप्त गरेको थियो । गोल संङख्याको आधारमा वडा नं २ समूह विजेता र वडा नं ७ समूह उपविजेता बन्दै प्रतियोगिताको सेमिफाइनलमा प्रवेश गरेका छन् ।
त्यस्तै बुधवार भएको दोस्रो खेलमा वडा नं. ३ विजयी भएको छ। वडा नं.८ लाई एक गोलका विरुद्ध तीन गोलको अन्तरले पराजित गर्दै वडा नं.३ ले प्रतियोगितामा तीन अङ्क जोडेको छ।
प्रतियोगितामा पाँच खेल खेलेको वडा नं ३ ले एक खेलमा बराबरी, एक खेलमा पराजित र तीन खेलमा विजयी बनेर प्रतियोगितामा दश अङ्क पुर्‍याएको छ । वडा नं ८ ले पाँच खेलमा तीन खेलमा पराजित र दुई खेलमा बराबरी खेल्दै लिगमा दुई अङ्क जोड्दै लिग टुङ्गाएको छ ।
खेलमा वडा नं ३ का मनिस कटुवाल म्यान अफ द म्याच घोषित भए । उनले नगद २ हजार १ सय सहित ट्रफि प्राप्त गरेका थिए । प्रतियोगितामा बिहीबार पहिलो खेल वडा नं १ र वडा नं ९ तथा दोस्रो खेल वडा नं ४ र वडा नं १० का बिच हुने आयोजकले जनाएको छ ।