इटहरी : लामो समयदेखि अवरुद्ध जग्गाको कित्ताकाटले रियलस्टेट व्यवसाय प्रभावित भइरहेको छ । जग्गाको वर्गीकरण गरिरहेको सरकारले सोही अनुसार कित्ताकाट गर्ने प्रक्रिया सुरु गरेको छ । पालिका स्तरबाटै भएको वर्गीकरणका प्रक्रियाहरू अझै टुङ्गो लाग्न सकेका छैनन् ।
उता सुनसरीको इनरुवामा भने आगामी दश दिन पछि देखी कित्ताकाट सुरु हुने भएको छ । इनरुवा नगरपालिकाका मेयर केदार भण्डारीका अनुसार पालिकाले वर्गीकरण गरेर नापी विभागमा बुझाइसकेको छ । केही दिनमै विभागको टोलीले फिल्ड निरीक्षण गर्ने र त्यसपछि कित्ताकाट सुरु हुने भएको उनले बताए ।
नापी कार्यालय इनरुवाका प्रमुख सञ्जीव कुमार शाहका अनुसार पालिकाबाट विवरण विभाग सम्म पुगिसकेको छ । वर्गीकरणको प्रक्रिया अन्तिम चरणमा भए पनि विभागले विज्ञ सहितको टोली खटाउने र त्यसपछि कित्ताकाटको प्रक्रिया सुरु हुने भएको छ ।
विभागले उपलब्ध गराएको विवरणको आधारमा वडा बाट सिफारिस हुने र सोही अनुसार कित्ताकाट हुने उनले बताए । सुनसरीको इनरुवाको हकमा १० दिनको आसपासमा टुङ्गो लागिसक्ने उनको भनाई छ ।
