धरान : श्रीलङ्कामा आर्थिक सङ्कटबाट उत्पन्न जनआन्दोलनको बेला सन् २०२२ मा राष्ट्रपतिले देश छोडेर भागेपछि पहिलो पटक राष्ट्रपतिका लागि आज शनिवार मतदान हुँदैछ ।
राष्ट्रपति पदमा वर्तमान राष्ट्रपति रनिल विक्रमसिंहे स्वतन्त्र प्रत्याशीका रूपमा उम्मेदवार छन् । उनीसँग समागी जाना बालाबवेगाया (एसजेबी) बाट साजिथ प्रेमादशा र नेशनल पिपुल्स पावर (एनपीपी)बाट अनुरा कुमारा चुनावी मैदानमा प्रतिस्पर्धा हुँदैछ ।
देशव्यापी विरोधले उग्र रूप लिएपछि तत्कालीन राष्ट्रपति गोटावाया राजपाक्षेले देश छोडेर भाग्नु परेको थियो । प्रधानमन्त्री महिन्दा राजपाक्षेले राजीनामा गर्नु परेको थियो । श्रीलङ्काको तत्कालीन सत्तामा एकै परिवारको हालिमुहालीले पनि असन्तोष बढेको थियो ।
तत्कालीन परिस्थितिमा युनाइटेड नेशनल पार्टीका रानिल विक्रमसिंघे श्रीलङ्काको राष्ट्रपति बनेका थिए । श्रीलङ्काको आर्थिक सुधार अहिले पनि धर्मराउँदो अवस्थामा छ । करमा भएको बृद्धि, आवश्यक वस्तु, सेवामा सरकारी अनुदान तथा कल्याणकारी कार्यमा कटौतीले जनताले समस्या भोग्नु परिरहेको छ ।
यस्तो अवस्थामा भइरहेको राष्ट्रपति चुनावलाई श्रीलङ्काली जनताले आर्थिक सुधार आउने आशाका रूपमा हेरेको बीबीसीले जनाएको छ । विश्लेषकहरू अनुसार जनता आर्थिक सुधारको पक्षमा रहेकाले चुनावमा कडा प्रतिस्पर्धा हुने यसैले जित्छ भन्न नसकिने अवस्था छ ।