_1749430366.gif)
धरान : सिद्धार्थ शिशु सदन स्कुल, धरान–१६ ले प्राज्ञिक र खेलकुद दुवै क्षेत्रमा जिल्ला स्तरीय प्रतियोगितामा उत्कृष्ट सफलता हासिल गर्दै दुई उपाधि हात पार्न सफल भएको छ।
प्याब्सन सुनसरीद्वारा आयोजित अन्तर–नगरपालिका जिल्ला स्तरीय हिज्जे प्रतियोगितामा सिद्धार्थ शिशु सदनले जिल्लाभरका २० उत्कृष्ट विद्यालयलाई पछि पार्दै प्रथम स्थान हासिल गरेको हो। प्रतियोगितामा धरान, इटहरी, दुहबी, राम धुनी, गढी र वराहक्षेत्र नगरपालिकाका उत्कृष्ट विद्यालयहरूको सहभागिता रहेको थियो।
उक्त प्रतिस्पर्धामा सिद्धार्थ शिशु सदनका कक्षा ५ का मुआज शाक्य, अभिज्ञ खतिवडा तथा कक्षा ४ की कृषा ढकाल प्रथम बन्न सफल भएका थिए।
त्यसै गरी,मोरङको बेलबारीमा सम्पन्न बेलबारी खुल्ला कराते च्याम्पियनसिप २०८२ मा विद्यालयकी कक्षा ६ की छात्रा सुबाष्ना श्रेष्ठले काता र कुमिते दुवै विधामा स्वर्ण पदक जित्दै दोहोरो सफलता हासिल गरेकी छन्।
विद्यालयका निर्देशक विकास सोनीले विद्यार्थीहरूको सफलताले विद्यालयको गरिमा र प्रतिष्ठालाई थप उचाइमा पुर्याएको बताउँदै एकै समयमा प्राप्त दुई ठुला उपलब्धिले विद्यालय परिवार, विद्यार्थी तथा अभिभावकहरूमा उत्साह थपेको उल्लेख गरे। उनले विद्यार्थीहरूको मेहनत र शिक्षकहरूको निरन्तर मार्गदर्शनकै कारण सिद्धार्थ शिशु सदनले जिल्लामै आफ्नो छुट्टै पहिचान बनाउन सफल भएको बताए।
