धरान : डिपोट माध्यमिक विद्यालयद्वारा सञ्चालन हुँदै आएको मेजर श्रवण कुमार लिम्बु मेमोरियल डिपोट बास्केटबल रनिङ कपको पाँचौँ संस्करण साउन १५ देखि १९ गते चल्ने भएको छ।
प्रतियोगिता डिपो स्कुलको बास्केटबल कोर्टमा सञ्चालन हुनेछ । सोमवार आयोजित पत्रकार सम्मेलनमा प्रिन्सिपल राजकुमार राईले प्रतियोगिता कक्षा १० सम्म विद्यार्थीलाई लक्षित गरी आयोजना गर्न लागिएको बताए ।
विद्यार्थीभित्र रहेको खेल प्रतिभाको विकास, विद्यालयहरूबिच आपसी सम्बन्ध र सद्भाव अभिवृद्धि तथा धरानमा बास्केटबल खेलको प्रवर्द्धन गर्ने उद्देश्यले प्रतियोगिता आयोजना गर्न लागिएको उनले बताए ।
प्रतियोगिता विद्यालयका पूर्व अध्यक्ष तथा डिपोट सार्वजनिक शैक्षिक गुठीका संस्थापक अध्यक्ष स्वर्गीय मेजर श्रवण कुमार लिम्बुको स्मृतिमा स्थापना गरिएको हो । प्रतियोगिता विजेताले नगद २० हजार, उपविजेताले १० हजार रुपैयाँसहित ट्रफी,मेडल र प्रमाणपत्र प्रदान गरिने जानकारी दिए । प्रतियोगितामा १६ टोलीको सहभागिता रहने छ ।
उत्कृष्ट खेलाडी एमभीपी,उच्च स्कोरर तथा राइजिङ प्लेयरलाई पनि ट्रफी र प्रमाणपत्र प्रदान गरिने आयोजकले जनाएको छ। प्रतियोगिताको प्राविधिक संयोजन धरान बास्केटबल सङ्घ र सुनसरी बास्केटबल सङ्घले गर्नेछ ।
प्रदेशस्तरीय प्रतियोगिता भए पनि यसमा १६ वटा टोलीलाई मात्र सहभागिताको अवसर दिइनेछ।