सुनसरी : १३ औँ संस्करणको कन्टोल इटहरी गोल्डकपको उपाधि सगरमाथा यूथ क्लब मोरङले जितेको छ ।
इटहरी रङ्गशालामा आज शनिवार सम्पन्न फाइनल खेलमा चर्च व्बाईज युनाइटेडलाई पेनाल्टी सुट आउटमा ६-५ गोल अन्तरले पराजित गर्दै सगरमाथाले लगातार दोस्रो पटक उपाधि उचालेको हो ।
निर्धारित समयमा दुवै टिमले गोल गर्न नसकेपछि खेलको निर्णय सिधै पेनाल्टी सुटआउटबाट लिइएको थियो । चर्च ब्वाइजका फ्रेकलिंग तल्ला, रञ्जित पाण्डे, मिलन राई, विदेशी खेलाडी बेम्पा र गोलकिपर प्रिसोको प्रहार गोलमा परिणत भए पनि मनोज राईको प्रहार आकासिएको थियो ।
सगरमाथाका अभिषेक लिम्बु, मेसुके ओलामावस, स्टेफिन बिनोंग, राजीव लोप्चन, महेन्द्र कार्की र विवेक बर्माको प्रहार गोलमा परिणत भएपछि सगरमाथाले उपाधि जितेको हो । सगरमाथाले उपाधिसँगै नगद १० लाख हात पारेको छ । उपविजेता चर्च ब्वाईजले ५ लाखमा चित्त बुझाएको छ ।
प्रतियोगिताको उत्कृष्ट खेलाडी सगरमाथाका क्याप्टेन महेन्द्र कार्की घोषित हुनै नगद १ लाख पाए । सर्वाधिक गोल गरेका मच्छिन्द्र क्लबका आफिज ओलावालेले ३० हजार पाए । 
प्रतियोगिताको क्वाटर फाइनलमा ४ र सेमिफाइनलमा १ गरी उनले ५ गोल गरेका थिए । सगरमाथाका देव लिम्बु बेष्ट गोलकिपर, विशाल बस्नेत बेष्ट डिफेण्डर, स्टेफिन बिनोंग बेष्ट फरवार्ड र याम गुरुङ बेष्ट कोच घोषित भए ।
 चर्च ब्वाइजका मौसम लिम्बु बेष्ट मिडफिल्डर र म्यान अफ द फाइनल घोषित भए । उनीहरूले जनही नगद २० हजार हात पारे । चैत्र ४ गते सुरु भएको प्रतियोगितामा ८ टिम सहभागी थिए  ।