वराहक्षेत्र : वराहक्षेत्र नगरपालिकामा सम्पन्न वडा स्तरीय वराहक्षेत्र मेयर लिग कप रनिङ शिल्ड फुटबल प्रतियोगिताको उपाधि वडा नं ३ ले हात पारेको छ ।
मङ्गलवार सम्पन्न फाइनल खेलमा वडा नं १ लाई एक गोलको विरुद्ध दुई गोलको अन्तरले पराजित गर्दै वडा नं ३ ले उपाधि हात पारेको हो ।
उपाधि हात पारेको वडा नं ३ ले दुई लाख एक हजार पुरस्कार प्राप्त गरेको छ । रनिङ्ग शिल्ड प्रतियोगिता भएकाले वडा नं ३ ले अर्को सिजनको लिग हुनु भन्दा एक महिनासम्मको लागि एक केजीको चाँदीको सुन्दर ट्रफी समेत प्राप्त गरेको छ ।
उक्त ट्रफी ३ पटक विजेता भएपछि मात्र विजेता टिमको स्वामित्वमा हुनेछ । त्यस्तै उपविजेता बनेको वडा नं १ ले एक लाख एक हजार प्राप्त गरेको छ।
तेस्रो बनेको वडा नं २ ले ५१ हजार र चौथौँ बनेको वडा नं ७ ले २५ हजार प्राप्त गरेका छन् । विजेता टिमलाई नगर प्रमुख रमेश कार्की, प्रमुख प्रशासकीय अधिकृत ऋद्धि प्रकाश सिटौला लगायत वडाध्यक्षहरू, जनप्रतिनिधि, राजनीति दलका प्रतिनिधिहरूले पुरस्कार रकम, ट्रफी, मेडल र प्रमाण पत्र हस्तान्तरण गरेका थिए ।
वराहक्षेत्र ७ देविघाट स्थित वसन्तऋतृ माध्यमिक विद्यालयको खेलमैदानमा सम्पन्न प्रतियोगितामा सर्बोत्कृट खेलाडी वडा नं ३ रोशन भुजेल घोषित भए ।उनले २१ हजार सहित ट्रफी प्राप्त गरेका थिए ।
उच्च गोलकर्ता नौ गोल गरेका वडा नं २ का दीपेश तामाङ घोषित भए । अनुशासित टिम वडा नं ४ घोषित भएको थियो । उनीहरूले ११ हजार प्राप्त गरे ।
उत्कृष्ट डिफेन्स वडा नं १ अभिसेक श्रेष्ठ, उत्कृष्ट मिकफिल्ड वडा नं ७ रविन राई, उत्कृष्ट फर्वाड वडा नं ३ यशराज बिक, उत्कृष्ट गोलरक्षक वडा नं ३ निसान थापा, राईजिङ खेलाडी वडा नं १ का प्रसन्न राई, उत्कृष्ट प्रशिक्षक वडा नं ३ अमृत बस्नेत विधागत उत्कृष्ट खेलाडीले पाँच हजार सहित ट्रफी हात पारेका थिए।
फाइनल खेलको म्यान अफ द म्याच वडा नं ३ का अनीश लिम्बू घोषित भए । उनले नगर २ हजार १ सय सहित ट्रफी प्राप्त गरेका थिए ।