इटहरी : उच्च शिक्षालय तथा माध्यमिक विद्यालय सङ्घ (हिसान) सुनसरीले खेल उत्सवको रूपमा मनाउँदै आएको प्रतियोगिता सुरु हुन लागेको छ। २०६९ सालदेखि खेल उत्सवको रूपमा परिचित 'हिसान स्पोर्टस् मिट २०८२' माघ १५ देखी २८ गतेसम्म तय भएको हो ।
सुनसरी जिल्लाभरिका २५ सय विद्यार्थीको प्रत्यक्ष सहभागिता रहने महोत्सवमा १५ हजारभन्दा बढी विद्यार्थी तथा शिक्षकले अवलोकन गर्ने भएका छन् ।
१२औँ संस्करणको स्पोर्ट्‌स मिटमा कक्षा १० सम्म १० विधामा ४१ खेल र कक्षा ११ र १२ का विद्यार्थीका ११ विधाका ३४ खेल हुँदैछ्न् । स्पोर्ट्स मिटलाई विद्यार्थी, अभिभावक र विद्यालयले उत्सवकै रूपमा ग्रहण गर्ने गरेको हिसान सुनसरीले जनाएको छ । 
फुटबल, भलिबल, बास्केटबल, क्रिकेट र एथलेटिक्सका विभिन्न प्रतियोगिता मार्फत विद्यार्थीलाई प्रतिस्पर्धा गराइने हिसान सुनसरीका अध्यक्ष सागरप्रसाद भटराईले बताए । फुटबल इटहरी २ को बुढासुब्बा खेलमैदानमा र क्रिकेट जनता क्रिकेट मैदानमा सञ्चालन हुने उनको भनाइ छ ।  
भलिबल पूर्वाञ्चल मावि तरहरा, बास्केटबल धरानस्थित सियोन स्कुलको कोर्टमा र एथलेटिक्सका इभेन्ट्सहरु इटहरी रङ्गशालामा खेलाइने अध्यक्ष भट्टराईले जानकारी दिए ।
त्यसबाहेक कविता प्रतियोगिता यसअघि नै सम्पन्न भएको छ भने वक्तृत्वकला, बुद्धिचाल, टेबल टेनिस, ब्याडमिन्टन र हाजिरी जवाफ प्रतियोगितालाई समेत समेटिएको छ ।