धरान : बिपी कोइराला स्वास्थ्य विज्ञान प्रतिष्ठान आसपास सञ्चालनमा रहेका २० वटा औषधि पसल सिलबन्दी गरिएको छ ।
इलाका प्रशासन, इलाका प्रहरी, औषधि व्यवस्था विभाग विराटनगर,वडा कार्यालयका प्रतिनिधिको संयुक्त टोलीले बिहीबारदेखि अनुगमन सुरु गरेको थियो ।
आज शुक्रवार गरिएको अनुगमनमा चौधरी होटेल लेखिएका घरबाट बिपी कोइराला स्वास्थ्य विज्ञान प्रतिष्ठानको ओपिडी कार्डहरू ठुलो परिमाणमा बरामद गरिएको छ । बरामद कार्डहरू इलाका प्रहरी कार्यालय धरानले नियन्त्रणमा लिएको छ ।
त्यसबारे थप अनुसन्धान भइरहेको प्रहरीले जनाएको छ । बोर्डमा होटेल लेखिएको भए पनि भित्र औषधि पसल सञ्चालन भइरहेको समेत भेटिएको छ । प्रतिबन्धित तथा लागू औषधिको सूचीमा रहेको ‘नोरफिन’ नामक औषधि पनि बरामद भएको जनाइएको छ ।
जिल्ला फार्मेसी सुपरभाईजर एलन खड्काका अनुसार अनुगमनका क्रममा विभिन्न कानुनी कमजोरी भेटिएपछि पसलहरू सिलबन्दी गरिएको हो ।
उनका अनुसार व्यवसायी वा दर्तावाला फार्मासिस्ट अनुपस्थित रहेको, व्यवसाय नवीकरण नगरेको,अनुगमन टोली पुगेपछि केही पसलका सञ्चालकले सटर बन्द गरी सम्पर्क विहीन भएको तथा अनुगमनमा असहयोग गरेकोले पनि शिल गरिएको हो ।
बिना दर्ता सञ्चालनमा रहेका केही औषधि पसल अनुगमनका क्रममा सटर बन्द अवस्थामा भेटिएको उनले बताए । त्यसरी विना दर्ता सञ्चालन भएका औषधि पसलको सङ्ख्या र नाम भने उनले बताएनन् ।
संयुक्त टोलीले बिहीबार र शुक्रवार गरी करिब ३० देखि ४० वटा औषधि पसलमा अनुगमन गरेको थियो। तीमध्ये बिहीबार ८ वटा र शुक्रवार १२ वटा गरी कुल २० वटा पसल सिलबन्दी गरिएको भण्डारीले जानकारी दिए।
सिलबन्दी गरिएका पसलका सञ्चालकलाई आवश्यक व्यावसायिक कागजातसहित सम्बन्धित निकायमा उपस्थित हुन निर्देशन दिइएको छ। कागजातको अध्ययनपछि प्रचलित कानुनबमोजिम थप कारबाही प्रक्रिया अघि बढाइने जनाइएको छ।
प्रतिष्ठान परिसरबाट बिचौलियाको आरोपमा १० जनालाई प्रहरीले पक्राउ गरेपछि औषधि व्यवसायीहरूले पसल बन्द गरी आन्दोलनमा उत्रिएपछि जिल्ला प्रशासनले औषधि पसलहरूको अनुगमनलाई निरन्तरता दिएको हो ।
