धरान : बिपी प्रतिष्ठान परिसरबाट पक्राउ गरिएका १० जना मेडिकल व्यवसायीद्वारा अनुसन्धानका प्रहरीले जिल्ला प्रशासनबाट ७ दिनको म्याद थप गराएको छ ।
इलाका प्रहरी कार्यालयका इन्स्पेक्टर बबिन राईका अनुसार अनुसन्धानका लागि म्याद थप गरिएकामा धरान १८ का २७ वर्षीय निखिल कुमार चौधरी, सप्तरीको राजविराज–६ की २७ वर्षीय रबिना मण्डल, भोजपुर आम चोक–८ का २५ वर्षीय हस्त श्रेष्ठ छन् ।
साथै धरान–१५ का २० वर्षीय सागर पोखरेल, मोरङको लेटाङ ३ का २९ वर्षीय सानिन किराँती, धरान–६ का २३ वर्षीय मनिष बुढाथोकी, उदयपुरको चौदण्डीगढी–५ का ४० वर्षीय उपेश कुमार चौधरी, धरान-१७ का ३५ वर्षीय धिरज निरौला, इटहरी-२ का ३१ वर्षीय रोहित मेहता र धरान ११ का २८ वर्षीय विनोद भट्टराई रहेका छन् ।
उनीहरूलाई प्रहरीले बिरामीलाई निजी मेडिकलबाट औषधि खरिद गर्न प्रलोभन देखाउँदै बिचौलियाको काम गरेको आरोपमा बुधवार राति पक्राउ गरेको थियो ।
यसैबिच व्यवसायीलाई पक्राउ गरेको विरोधमा बुधवार बिहान बन्द गरिएका बिपी प्रतिष्ठान परिसरका २ सय औषधि पसल दिउँसो खुलेको छ । उनीहरूले औषधि पसल बन्द गरेर इलाका प्रहरी कार्यालय अगाडि धर्ना दिएका थिए ।
व्यवसायीहरूले पक्राउ परेका सहकर्मीहरू रिहा नभएसम्म मेडिकल पसल बन्द रहने बताएका थिए । तर अति आवश्यकिय सेवा ऐन तथा मेडिकल व्यवसाय आचार संहिताले व्यवहारिक कारणले पसलहरू खुला गरिएको बताइएको छ ।
बिपी प्रतिष्ठान इमरजेन्सी भवन अगाडिबाट प्रहरीले पहिलो पटक २ जनालाई पक्राउ गरेको थियो । पक्राउ पर्नेमा झापा दमक १ कुमाल चोकका ४३ वर्षीय प्रवीण पोखरेल र सुनसरी हरिनगर–४ का २७ वर्षीय दीपक राम थिए ।
पक्राउ परेका २ जनासँग औषधि व्यवसायीहरूको सरोकार नभएको उनीहरूले जनाएका छन् । पक्राउको विरोध गरिरहेका औषधि व्यवसायीहरूले उनीहरू रिहालाई नगरिए आन्दोलन कसरी गर्नेबारे छलफल भइरहेको बताएका छन् ।
