धरान : बीपी कोइराला स्वास्थ्य विज्ञान प्रतिष्ठानमा एमआरआई मेसिन खरिदको टेण्डर आव्हान हुनु अगावै ५ वटा कम्पनीले प्रतिष्ठानलाई मेसिनको प्राविधिक विशेषताहरू प्रस्तुत गरेका छन् ।
मेसिन खरिद गर्नु अघि सम्बद्ध सप्लायर्स, कम्पनी र मेसिनको विषय खरिद प्रक्रियालाई थप पारदर्शी, प्रतिस्पर्धी र व्यवस्थित बनाउन नयाँ अभ्यास सुरु गरिएको प्रतिष्ठानले जनाएको छ।
प्रतिष्ठानका प्रमुख डा. ईन्द्र लिम्बुले परम्परागत खरिद प्रक्रियामा परिवर्तन गर्दै पहिलो पटक टेन्डर आह्वान गर्नुअघि सम्भावित आपूर्तिकर्ता कम्पनीहरूबाट प्राविधिक प्रस्तुतीकरण (प्रिजेन्टेसन) गराइएको जानकारी दिए।उनका अनुसार यो अभ्यासले खरिद प्रक्रियालाई पारदर्शी बनाउनेछ ।
यसअघि बायोमेडिकल इन्जिनियरले स्पेसिफिकेसन तयार गरेर सिधै टेन्डर आह्वान गरिन्थ्यो । उनले भने ‘हामीले परम्परागत खरिद प्रक्रियामा नयाँ अभ्यास सुरु गरेका छौँ ।"
पुरानो प्रक्रियामा स्पेसिफिकेसन सीमित हुने,चिकित्सक तथा बायो मेडिकल टोलीले बजारमा उपलब्ध नवीनतम प्रविधि र सुविधाबारे पर्याप्त जानकारी नपाउने उनले बताए । त्यस कारण टेन्डर प्रक्रियामा पटक–पटक संशोधन गर्नुपर्ने अवस्था आउँथ्यो ।
यसपाली नेपालमा एमआरआई मेसिन सप्लाई गर्ने कम्पनीलाई प्रतिष्ठानमै बोलाएर प्रिजेन्टेसन गराइएको छ। मेसिनका प्राविधिक विशेषता, सुविधा, स्पेसिफिकेसन तथा अनुमानित लागतबारे अग्रिम जानकारी प्राप्त भएको उनको भनाई छ ।
टेण्डर अघि मेसिनबारे जानकारी गराउने कम्पनीहरूमा फुजी, युनाइटेड इमेजिङ, फिलिप्स, सिमेन्स र जीई पाँच कम्पनी छन्।
प्रतिष्ठानले एमआरआई खरिद अन्तर्राष्ट्रिय प्रतिस्पर्धात्मक बोलपत्र (आईसीबी) मार्फत गर्ने तयारी गरेको छ। आईसीबी प्रक्रियाबाट खरिद गर्दा मूल्य अभिवृद्धि कर (भ्याट)लगायतका केही कर छुटको सुविधा प्राप्त हुने भएकाले मेसिनको लागत अघिल्लो तुलनामा कम पर्ने प्रतिष्ठानको भनाई छ ।
