इटहरी : कोशी प्रदेश सरकारले आर्थिक वर्ष २०८३/८४ को बजेट नीति तथा कार्यक्रममा हस्पीटालीटी क्षेत्रलाई आर्थिक विकासको मानकको रूपमा अगाडी सारेको छ ।
आर्थिक मामिला तथा योजना मन्त्री विदुर बहादुर लिङ्थेपले होटेल तथा रेस्टुरेन्ट व्यवसायलाई प्रोत्साहन गर्न इजाजत पत्र प्राप्तिमा समेत सहुलियत दिने व्यवस्था गरेका हुन् ।
कोशी भ्रमण वर्षलाई लक्षित गर्दै भारतीय पर्यटकलाई प्रत्यक्ष सेवा प्रदान गर्ने सवारीसाधनलाई पूर्ण कर छुट दिने व्यवस्था पनि बजेटमा समावेश गरिएको छ । भारतीय पर्यटकको चाप बढिरहेको बेला थप प्रोत्साहनको कार्यक्रम ल्याइएको हो ।
कोशी भ्रमण वर्षको लागि १२ करोड १२ लाख बजेट विनियोजन गरिएको छ । विभिन्न पदमार्ग निर्माणको लागि थप १२ करोड ७७ लाख बजेट छुट्टाइएको छ ।
प्रदेश लगानी प्राधिकरणसँग लगानी सम्मेलनमार्फत सम्झौता भएका परियोजनाहरूले लिखत प्रमाणीकरण गर्दा लाग्ने शुल्कमा ७५ प्रतिशत छुट पाउनेछन् । यसअघि प्राधिकरण सँग सम्झौता भएका अधिकांश परियोजना हस्पिटालीटीसँग सम्बन्धित छन् ।
कोशी प्रदेश एकीकृत पर्यटन विकास गुरुयोजना ल्याउने तयारी गरेको सरकारले पर्यटन वन तथा वातावरण क्षेत्रमा ३ अर्ब ४९ करोड बजेट विनियोजन गरेको छ ।
