 (13)_1727965004.gif)
धरान : अखिल नेपाल फुटबल सङ्घ एन्फाको ४ स्थानका रहेका एन्फा एकेडेमीका लागि यु-१३ का बालबालिकाको छनौट प्रक्रिया बुधवार देखी धरानमा सुरु भएको छ ।
सातै प्रदेशमा छानिएका ९० जना यु-१३ का बालबालिकाहरूलाई विद्यालय शिक्षा सहित ४ वर्ष सम्म एन्फाको ४ स्थानमा रहेको एकेडेमीमा आवासीय फुटबल प्रशिक्षण दिइने एन्फा केन्द्रीय मानार्थ उपाध्यक्ष तथा कोशी प्रदेश फुटबल सङ्घका अध्यक्ष किशोर राईले बताए ।
धरानमा आज बिहान एन्फा एकेडेमीमा कोशी प्रदेशको छनौट प्रक्रिया सुरु गर्दै अध्यक्ष राईले भने, ‘अबको दश वर्षमा नेपाली फुटबललाई विश्वकप सम्म पुराउने लक्ष्य एन्फाले लिएको छ ।’
एन्फाको लक्ष्य पुरा गर्न अब राज्य, स्थानिय सरकारका साथै अभिभावक समुदायको सहभागिता पनि आवश्यक भएको उनले बताए । एन्फाले यस वर्ष देखी फुटबलमा महिला प्रतिभा उत्पादनलाई प्राथमिकता दिएको उनको भनाई छ ।
यु-१३ मा छनौट भएका बालिकाहरूलाई रौतहट स्थित एन्फा एकेडेमीमा विद्यालय शिक्षा सहित विशेष प्रशिक्षण दिइने छ ।
धरानमा कोशी प्रदेश स्थित १४ जिल्लाबाट छनौट भएर आएका बालबालिकाको छनौट प्रक्रिया ४ दिन सम्म चल्नेछ ।
आज पहिलो दिन जिल्लाहरूबाट छनौट भई आएका ४० बालिकाहरूको छनौट प्रक्रिया सुरु भएको हो । छनौटका लागि एन्फाबाट आएका ग्रास रुट फुटबल निर्देशक पङ्कज शाही सहित जिल्ला फुटबलका प्रशिक्षकहरू संलग्न छन् ।
छनौट कार्यक्रमको उद्घाटन कार्यक्रम कोशी प्रदेश फुटबल सङ्घ अध्यक्ष राईको सभापतित्वमा भएको थियो । उपाध्यक्ष शिव न्यौपानेले कार्यक्रममा उपस्थित अभिभावक, अतिथिहरूलाई स्वागत गरेका थिए ।
एन्फा ग्रास रुट प्रमुख पङ्कज शाहीले छनौट प्रक्रिया एन्फाको मापदण्ड अनुसार सहभागीहरूको खेल प्रतिभा, टिम वर्क क्षमता, व्यवहार र फुटबलप्रतिको प्रतिबद्ध जस्ता ४ विषयमा केन्द्रित रहने बताए ।
