धरान: बिपी प्रतिष्ठानमा आज बिहीबार बिहान आयोजित ६४ औँ नेपाल नर्सिङ दिवसमा प्रतिष्ठानकी नर्स हरि कुमारी राई सम्मानित भएकी छन् ।
उनलाई नेपाल नर्सिङ सङ्घ बिपी प्रतिष्ठानले सम्मान गरेको हो ।
कार्यक्रममा उपकुलपति विक्रम प्रसाद श्रेष्ठले प्रतिष्ठानका नर्सहरू कति अनुशासित, दक्ष र सेवाभावयुक्त छन् भन्ने कुरा जनताले अनुभूति गर्नु नर्सिङ दिवसका सार्थकतासँग जोडिएको बताए । उनले भने ‘नर्सिङ दिवस मनाएर मात्र पर्याप्त हुँदैन नर्सिङ पेशाको मर्मलाई व्यवहारमा अपनाउन जरुरी छ ।’
‘सुरक्षित र मर्यादित नर्सिङ पेशा, जनतालाई गुणस्तरीय सेवा’ नाराका साथ नेपाल नर्सिङ सङ्घ, बिपी प्रतिष्ठानले नर्सिङ दिवस मनाएको हो । नेपाल नर्सिङ सङ्घका अध्यक्ष तथा बिपी प्रतिष्ठानका मेट्रोन कला थापाको सभापतित्वमा कार्यक्रम भएको थियो ।
अध्यक्ष थापाले प्रतिष्ठानमा ८ सय ६४ जना नर्सहरू कार्यरत रहेको बताउँदै नर्सहरू बिपी प्रतिष्ठानको सम्हाल्न दह्रो हाँगा भएको बत्ताइन् । नर्स र बिपीको नङ र मासु सम्बन्ध कायम राख्न बिपी प्रतिष्ठानले सुरक्षित तरिकाले निर्धक्क काम गर्ने वातावरण बनाउनु पर्नेमा उनले जोड दिइन् ।
नर्सहरूको पेसागत सुरक्षा र हकहितका लागि २०१८ माघ १५ गते नेपाल नर्सिङ सङ्घको स्थापना गरिएको थियो। सोही दिनको सम्झनामा प्रत्येक वर्ष नर्सिङ दिवस मनाइँदै आएको छ ।
नेपालमा नर्सिङ पेशाको इतिहास त्यति लामो नभए पनि हाल यो पेशा अपनाउनेको सङ्ख्या उल्लेख्य छ । सन १९४७ मा वीर अस्पतालबाट नर्सिङ सेवाको सुरुवात हुँदा सीमित जनशक्ति रहे पनि अहिले देशभरका अस्पतालहरूमा नर्सहरूले महत्त्वपूर्ण भूमिका खेल्दै आएका छन् ।
नेपाल नर्सिङ काउन्सिलका अनुसार हाल देशभर करिब १ लाख २२ हजार ३१३ जना नर्सहरू दर्ता भएका छन्, जसमा मिडवाइफ तथा अन्य श्रेणीका नर्सहरू पनि समावेश छन् । तथ्यांक अनुसार २५ हजार भन्दा बढी नर्सहरू विदेशिएका छन् ।
