इश्वर श्रेष्ठ
दुबई : नेपालको चर्चित गोल्डकप फुटबल प्रतियोगिता बुढासुब्बा गोल्डकपलाई अन्तर्राष्ट्रिय स्तरमा प्रवर्द्धन गर्न धरान युनाइटेड फुटबल क्लब, युएईले दोस्रो संस्करणको बुढासुब्बाकप फुटबल प्रतियोगिता आयोजना गर्ने भएको छ।
प्रतियोगिता सन् २०२६ मे ९ का दिन दुबईस्थित वुल्डलेम स्कुलको खेलमैदानमा सञ्चालन हुने आयोजकले जनाएको छ।
युएई नेपाली फुटबल सङ्घ (यूएनएफए) को संयोजनमा सञ्चालन हुने प्रतियोगिता सुभेन-ए साइडमा खेलाइने छ।
प्रतियोगिता नेपाली समुदायमा हालसम्मकै उच्च पुरस्कार राशिसहित आयोजना गर्न लागिएको आयोजक संयोजक स्वीकार राईले बताए ।
धरान युनाइटेड फुटबल क्लबले हरेक वर्ष विभिन्न फुटबल प्रतियोगिताहरू आयोजना गर्दै आएको छ। गत वर्ष सम्पन्न धरान हेल्पिङ ह्याण्ड्स कप २०२५ उच्च पुरस्कार राशिसहित सफलतापूर्वक सम्पन्न भएको थियो। क्लबले हालै मात्र भेट्रान बुढासुब्बा कप पनि सफलतापूर्वक सम्पन्न गरेको छ ।
प्रतियोगितामा आयोजक धरान युनाइटेड फुटबल क्लबसहित २४ वटा क्लबहरूको सहभागिता रहनेछ, जसमध्ये २२ वटा नेपाली क्लबहरू सहभागी हुनेछन्।
प्रतियोगिताको विजेताले ५,५५५ दिराम (नेरु. २,२२,०००) र उपविजेताले ३,००० दिराम (नेरु १,२०,०००) पुरस्कार प्राप्त गर्ने जानकारी क्लबका अध्यक्ष तथा युएई नेपाली फुटबल सङ्घका उपाध्यक्ष ईश्वर श्रेष्ठ ले दिए ।
प्रतियोगितालाई सफल बनाउन प्रभु बैङ्क, जी.सी.डी. ग्रुप अफ कम्पनीज, कदूश प्रोपर्टिज, माइक्रोफ्याब स्ट्रक्चरल म्यानुफ्याक्चरिङ स्टिल एसएलसी तथा टप रेस्टुरेन्टले प्रायोजन गरेका छन्।