धरान : धरान उपमहानगरपालिका प्रमुख अइन्द्रविक्रम बेघाले धरानमा मुख्य कार्यालय रहेको नेपाल परिवार नियोजन सङ्घ सुनसरी शाखाले जिल्लाको १२ वटै स्थानीय तहसँग समन्वय गरेर सेवा विस्तार गर्न आवश्यक रहेको बताएका छन् ।
शाखाको ४७ औँ वार्षिकोत्सवमा शनिवार नयाँ कार्यसमिति स्वागत कार्यक्रममा प्रमुख अतिथि बेघाले सरकार परिवर्तनसँगै नीति र कार्यशैलीमा आउने प्रभावलाई मध्यनजर गर्दै तीनै तहका सरकारसँगको समन्वय तथा सहकार्य अझ सुदृढ बनाउनुपर्ने बताए ।
सङ्घकी केन्द्रीय सदस्य चन्द्रमाया श्रेष्ठले सामाजिक संस्थाहरू व्यक्तिगत स्वार्थ वा नाफाभन्दा माथि उठेर विशुद्ध सेवा भावका साथ समाजको हितमा समर्पित हुनुपर्ने बताइन । स्थानीय सरकारसँग प्रभावकारी साझेदारी आवश्यक रहेको बताउँदै उनले भनिन् ‘सङ्घले सुनसरीका १२ वटै स्थानीय तहमा सेवा विस्तार आवश्यक छ ।’
नेपाली काँग्रेस धरानका सभापति श्याम पोख्रेलले परिवार नियोजन सङ्घले मानव सेवा तथा पहुँचबाहिर रहेका गरिब, विपन्न र सेवाग्राहीका लागि निरन्तर काम गर्दै आएको बताए । कार्यक्रममा संस्थाका जग्गादाता वीरेन्द्रसिंह थापा र रामचन्द्र अधिकारीलाई सम्मान गरिएको थियो। यस्तै धरान उपमहानगरपालिका–७, ८ र ९ का वडाध्यक्षलाई पनि दोसल्ला ओढाएर सम्मान पत्रले सम्मान गरिएको थियो।
उत्कृष्ट कर्मचारीका रूपमा सिनियर अनमी मायाकुमारी भट्टराई र अर्का कर्मचारी दीपबहादुर भण्डारी सम्मानित भए भने कार्यसमितिकी युवा सदस्य संस्कृति मास्केलाई बिदाइ गरिएको थियो।
सङ्घको अध्यक्षमा पुन निर्मला अधिकारी:
यसैबिच,नेपाल परिवार नियोजन सङ्घ सुनसरी शाखाको अध्यक्षमा पुनः निर्मला अधिकारी निर्वाचित भएकी छन् । कोषाध्यक्षमा सागर प्रसाई र युवा सदस्यमा प्रशान्ती शाक्य निर्वाचित भएका छन् । नवनिर्वाचित कार्यसमितिको कार्यकाल २०८४ देखि २०८६ सालसम्म तीन वर्ष रहने बताइएको छ ।
