धरान : साहित्यकार शान्ति खिम्दिङ लिम्बूको कविता सङ्ग्रह ‘थेम्सको लहरमा तमोरको स्पर्श’ ललितपुर तिखेदेवलमा विमोचन गरिएको छ । शनिवार लेखक खगेन्द्र सङ्ग्रौला, चलचित्र निर्देशक नवीन सुब्बा, डा तुलसी गौतम, कवि विमला तुम्खेवा, समालोचक गुरुङ सुशान्त लगायतले संयुक्त रूपमा किताब विमोचन गरे ।
यो उनको चौथो कृति हो । यसअघि उनको उपन्यास मिलीजुली (२०१७), अंग्रजीमा इमोशनल इन्टेलिजेन्स फर लिडरशीप (२०१८) र गीत, मुक्त सङ्ग्रह कस्तुरी यात्रा (२०२४) प्रकाशित छन् ।
आयाम सरोकार समाज काठमाडौँद्वारा आयोजित विमोचनमा प्रमुख वक्ता सङ्ग्रौलाले ‘थेम्सको लहरमा तमोरको स्पर्श’ भित्र सङ्ग्रहित कविताहरूले बेलायत लन्डनको डायोस्पोरिक जीवनको सङ्घर्ष र आफ्नो मातृभूमिको प्रेमिल भावनालाई व्यक्त गर्न थेम्स नदी र तमोर नदीलाई विम्ब बनाएको बताए ।
समालोचक गुरुङ सुशान्तले श्रष्टा शान्तिले कविताहरूमा आफ्नो पुर्ख्यौली थलो सिन्चने तमोर नदीलाई सशक्त विम्ब बनाएर त्यहीको प्रकृतिमा रहेका ढुङ्गा–माटोसँगको सामीप्यतालाई स्पर्श को रूपमा प्रस्तुत गरेको बताए ।
निर्देशक नविन सुब्बाले याक्थुङ लिम्बूको प्राचीन मुन्धुमले मानवीय चेतनासँगै समग्रता, सम्पूर्णता, सहअस्तित्व र सामूहिकताको पक्षमा जोड गरेजस्तै श्रष्टा शान्तिको कविता कृतिमा ती आदर्श र दर्शनहरू पनि समेटिएको बताए ।
कवि बिमला तुम्खेवाले विश्वव्यापी लेखकीय संरचनामा महिलाहरूको विषयलाई प्रमुख बनाइने गरेको उल्लेख गर्दै नारीवादका विषय, मानव जीवनको जरा, नारी चेतनाका विषय समेटिएको बताइन् ।
श्रष्टा शान्ति लिम्बूले तमोरले सिँचिएको ताप्लेजुङको नाङखोल्याङ हुँदै झापा, झापा हुँदै ललितपुर, फेरि ललितपुर हुँदै बेलायतसम्मको जीवनको यात्राका अनेक मोड र सङ्घर्षमा सहभागी हुँदा आफ्ना मनमा आएका धेरै भावना र र विचारहरूलाई समेटेर कविता कृति तयार भएको बताइन् ।
उनी कम्प्युटर इन्जिनियर हुँदै सेन्ट जोन योर्क विश्वविद्यालयबाट नवप्रवर्तन तथा परिवर्तन व्यवस्थापनमा स्नातकोत्तर (एमबिए) गरेकी साहित्यिक श्रष्टा हुन ।
सङ्ग्रहका ३ खण्डमा ४३ कविताहरू समावेश छन् । पुस्तक रत्न पुस्तक भण्डारले प्रकाशित गरेको हो ।
